Numeros 27 | Holy Bible Words

Numeros 27:1
Unya miduol ang mga anak nga babaye ni Zelofehad nga anak ni Hefer nga anak ni Gilead nga anak ni Makir nga anak ni Manases, sa mga panimalay ni Manases nga anak ni Jose. Ug kini mao ang mga ngalan sa mga anak niya nga babaye: si Mala, si Noa, si Hogla, si Milca, ug si Tirsa.…
Numeros 27:2
Ug mitindog sila sa atubangan ni Moises ug sa atubangan ni Eleasar nga pari, ug sa atubangan sa mga pangulo ug sa tibuok nga katilingban, didto sa pultahan sa tolda nga tagboanan ug nag-ingon, …
Numeros 27:3
Ang among amahan namatay didto sa kamingawan ug siya wala mahilakip sa kaubanan nila nga nagtigom sa ilang kaugalingon batok sa Ginoo sulod sa ginsakopan ni Korah, apan siya namatay sa iyang kaugalingong sala ug siya walay mga anak nga lalaki.…
Numeros 27:4
Ngano bang kuhaon ang ngalan sa among amahan gikan sa taliwala sa iyang panimalay, tungod lamang kay siya walay mga anak nga lalaki? Ihatag kanamo ang usa ka panulondon uban sa kaigsoonan nga lalaki sa among amahan.”…
Numeros 27:5
Busa gidala ni Moises ang ilang gipangayo sa atubangan sa Ginoo.…
Numeros 27:6
Ug ang Ginoo miingon kang Moises, …
Numeros 27:7
“Ang mga anak nga babaye ni Zelofehad nagsulti sa matarong. Ihatag kanila ang pagpanag-iya sa usa ka panulondon taliwala sa kaigsoonang lalaki sa ilang amahan ug ipasunod kanila ang panulondon sa ilang amahan.…
Numeros 27:8
Ug sultihi ang katawhan sa Israel, ‘Kon ang usa ka tawo mamatay ug walay anak nga lalaki, sa ingon niana ipasunod ninyo ang iyang panulondon ngadto sa iyang anak nga babaye. …
Numeros 27:9
Ug kon siya walay anak nga babaye, ihatag ninyo ang iyang panulondon ngadto sa iyang mga igsoon nga lalaki.…
Numeros 27:10
Ug kon siya walay mga igsoon nga lalaki, ihatag ninyo ang iyang panulondon ngadto sa mga igsoon nga lalaki sa iyang amahan.…
Numeros 27:11
Ug kon ang iyang amahan walay igsoon nga lalaki, ihatag ninyo ang iyang panulondon ngadto sa iyang kadugo nga labing duol kaniya sa iyang banay ug siya manag-iya niini. Ug kini mahimong lagda ug tulumanon alang sa katawhan sa Israel, sumala sa gisugo sa Ginoo kang Moises.’ ”…
Numeros 27:12
Ang Ginoo miingon kang Moises, “Tungas niining bukira sa Abarim ug tan-awa ang yuta nga akong gihatag sa katawhan sa Israel. …
Numeros 27:13
Ug sa diha nga imong makita kini, matipon usab ikaw ngadto sa imong katawhan, ingon nga si Aaron nga imong igsoon gitipon,…
Numeros 27:14
Tungod kay misupak man ikaw batok sa akong pulong didto sa kamingawan sa Zin, sa diha nga nagkaguliyang ang katilingban, aron sa pagbalaan kanako didto sa katubigan sa atubangan sa ilang mga mata.” Kini mao ang katubigan sa Meriba sa Cades didto sa kamingawan sa Zin.…
Numeros 27:15
Unya si Moises miingon sa Ginoo,…
Numeros 27:16
“Himoon unta sa Ginoo, ang Dios sa mga espiritu sa tanan nga unod, ang pagtudlo ug usa ka tawo ibabaw sa katilingban, …
Numeros 27:17
Nga mag-una kanila sa paggula ug mag-una kanila sa pagsulod ug siya nga mangulo kanila sa paggula, ug siya nga mangulo kanila sa pagsulod aron ang katilingban sa Ginoo dili mahisama sa mga karnero nga walay tigbantay.”…
Numeros 27:18
Ug ang Ginoo miingon kang Moises, “Dad-a si Josue nga anak ni Nun, usa ka tawo nga kaniya anaa ang Espiritu, ug ipandong ang imong kamot ibabaw kaniya, …
Numeros 27:19
Ug patindoga siya sa atubangan ni Eleasar nga pari ug sa tibuok nga katilingban ug sangonan nimo siya sa katungdanan diha sa ilang panan-aw. …
Numeros 27:20
Ug magbutang ikaw sa uban nimong kagahom sa ibabaw niya aron ang tibuok nga katilingban sa katawhan sa Israel motuman kaniya.…
Numeros 27:21
Ug siya mobarog sa atubangan ni Eleasar nga pari nga maoy magpakisayod alang kaniya sa paghukom sa Urim sa atubangan sa Ginoo. Sa iyang pulong manggula sila ug sa iyang pulong manulod sila, siya ug ang tanang katawhan sa Israel uban kaniya, ang tibuok nga katilingban.”…
Numeros 27:22
Busa nagbuhat si Moises sumala sa gisugo sa Ginoo kaniya ug iyang gikuha si Josue ug gibarog sa atubangan ni Eleasar nga pari ug sa atubangan sa tibuok nga katilingban.…
Numeros 27:23
Ug gipandong niya ang iyang mga kamot kang Josue ug gisangonan siya sa katungdanan sumala sa gisulti sa Ginoo pinaagi kang Moises.…