Exodo 22 | Holy Bible Words

Exodo 22:1
Kon ang usa ka tawo mangawat ug baka o karnero ug ihawon niya kini o ibaligya, kinahanglan nga mobayad siya ug lima ka baka alang sa usa ka baka, ug upat ka karnero alang sa usa ka karnero. Ang kawatan mag-uli sa hingpit gayod, kon wala gayod siyay mahimo, ibaligya siya alang sa iyang nakawat. …
Exodo 22:2
Kon ang kawatan maabtan nga nanglungkab ug gikulata unya mamatay, walay pakasad-on sa iyang dugo. …
Exodo 22:3
Apan kon naabtan siya sa pagsilang sa adlaw, adunay pakasad-on sa iyang dugo.…
Exodo 22:4
Kon ang kinawat nga mananap makaplagan nga buhi diha sa iyang kamot, baka man o asno o karnero, kinahanglang magbayad siya ug duha ka pilo.…
Exodo 22:5
“Kon ang usa ka tawo maoy makaingon sa uma o parasan nga masibsiban o magbuhi sa iyang hayop ug kini makasibsib sa uma sa uban, kinahanglan nga bayran niya kini gikan sa labing maayo sa iyang uma ug sa labing maayo sa iyang parasan.…
Exodo 22:6
“Kon may sunog ug kini mokatay ngadto sa kasampinitan nga tungod niini ang pinundok nga uhay o ang uhay nga nagtindog o ang tibuok nga uma masunog, ang nagduslit sa kalayo kinahanglang mobayad gayod.…
Exodo 22:7
“Kon ang usa ka tawo magtugyan ug salapi o katigayonan ngadto sa iyang isigkatawo aron patipigan, unya kawaton kini diha sa balay niadtong tawhana, kon ang kawatan masakpan, kinahanglang mobayad siya ug duha ka pilo. …
Exodo 22:8
Kon ang kawatan dili masakpan, ang tag-iya sa balay kinahanglang moduol ngadto sa Dios aron sa pagpakita kon nanghilabot ba siya o wala sa bahandi sa iyang isigkatawo.…
Exodo 22:9
“Kay ang tanang matang sa paglapas sa pagsalig mahitungod sa baka, sa asno, sa karnero, sa bisti o mahitungod sa bisan unsang butang nga nawala, nga adunay moingon, “Mao kini,” ang kaso sa duha ka tawo kinahanglang dad-on sa atubangan sa Dios ug siya nga hukman sa Dios kinahanglang mobayad ug duha ka pilo ngadto sa iyang isigkatawo.…
Exodo 22:10
“Kon ang usa ka tawo magtugyan ngadto sa iyang isigkatawo ug asno o baka o karnero o bisan unsang mananap aron pabatonan unya mamatay kini o maangol o gikuha nga walay nakakita niini, …
Exodo 22:11
Ang panumpa sa Ginoo magpataliwala kanilang duha aron sa pagsuta kon wala ba gayod siya manghilabot sa bahandi sa iyang isigkatawo, ug ang tag-iya modawat sa panumpa, ug ang nagbantay dili kinahanglang mobayad. …
Exodo 22:12
Apan kon kini gikawat gikan kaniya, kinahanglang mobayad siya sa tag-iya niini. …
Exodo 22:13
Kon nakuniskunis kini sa mga mananap, kinahanglang dad-on kini niya ingon nga kamatuoran ug dili siya pabayaron sa unsay nakuniskunis.…
Exodo 22:14
Kon ang usa ka tawo manghulam ug hayop sa iyang isigkatawo, unya naangol kini o mamatay, ug ang tag-iya niini wala diha, kinahanglan nga siya mobayad gayod. …
Exodo 22:15
Kon ang tag-iya niini diha, ang nanghulam dili pabayaron. Kon kini inabangan, ang kadaot mataplan sa abang.…
Exodo 22:16
“Kon tintalon sa usa ka lalaki ang usa ka ulay nga dili sinayoran ug makigdulog kaniya, kinahanglan nga mohatag siya sa bugay alang kaniya ug kini iyang pangasaw-on. …
Exodo 22:17
Kon ang amahan sa babaye magdumili gayod sa paghatag kaniya ngadto sa lalaki, kinahanglan nga mobayad ang lalaki sa bili nga tukma sa bugay alang sa mga ulay.…
Exodo 22:18
“Ayaw gayod tugoti nga mabuhi ang babayeng tigsalamangka.…
Exodo 22:19
“Si bisan kinsa nga makighilawas sa mananap, kinahanglan nga patyon.…
Exodo 22:20
“Si bisan kinsa nga maghalad ngadto sa bisan unsang dios gawas sa Ginoo lamang kinahanglang laglagon.…
Exodo 22:21
“Ayaw buhati ug daotan ang usa ka langyaw o magdaogdaog kaniya, kay kamo mga langyaw kaniadto sa yuta sa Ehipto. …
Exodo 22:22
Ayaw ninyo pasipad-i si bisan kinsa nga biyuda o ilo.…
Exodo 22:23
Kon pasipad-an ninyo sila unya magpakitabang sila kanako, pamation gayod nako ang ilang mga pagpakitabang.…
Exodo 22:24
Ug ang akong kapungot mosilaob ug patyon ko kamo pinaagi sa espada, ug ang inyong mga asawa mangahimong biyuda ug ang inyong mga anak mahimong walay mga amahan.…
Exodo 22:25
“Kon magpahulam kamo ug salapi ngadto kang bisan kinsa sa akong katawhan nga kabos nga anaa uban kanimo, ayaw kamo pagpakasama sa mga tigpahulam ngadto kaniya ug ayaw gayod pangayo ug tubo gikan kaniya. …
Exodo 22:26
Kon magdawat ikaw ug bisti ingon nga garantiya sa imong isigkatawo, kinahanglan nga iuli nimo kini kaniya sa dili pa mosalop ang adlaw,…
Exodo 22:27
Kay mao lamang kini ang iyang igtatabon, mao kini ang iyang kupo alang sa iyang lawas. Unsa may lain nga iyang katulgan? Ug kon magpakitabang siya kanako, pamation nako siya kay maluluy-on man ako.…
Exodo 22:28
“Ayaw kamo pagsulti ug daotan batok sa Dios o magtunglo sa tigdumala sa inyong katawhan.…
Exodo 22:29
“Ayaw langana sa paghatag ang inyong mga halad gikan sa kadagaya sa inyong mga abot ug gikan sa mga inawas sa inyong mga pug-anan. “Ihatag ninyo kanako ang kamagulangan sa inyong mga anak. …
Exodo 22:30
Buhata usab ninyo kini sa inyong mga baka ug sa inyong mga karnero. Pito ka adlaw nga magpabilin ang kamagulangan diha sa iyang inahan ug sa ikawalo nga adlaw, ihatag kini kanako.…
Exodo 22:31
“Kamo mahimong mga tawo nga balaan alang kanako busa ayaw kamo pangaon ug unod nga gikuniskunis sa mga mananap nga ihalas sa kapatagan, ilabay ninyo kini ngadto sa mga iro.…