Holy Bible Words
Read The Bible Online

Deuteronomio 7

  • Deuteronomio 7:1
    “Sa diha nga ang Ginoo nga inyong Dios magdala kaninyo ngadto sa yuta nga inyong adtoan aron sa pagpanag-iya niini ug mag-abog sa daghang mga nasod gikan sa inyong atubangan, sa Hitihanon, sa Gergasihanon, sa Amorihanon, sa Canaanhon, sa Perisihanon, sa Hibihanon ug sa Jebusihanon, pito ka nasod nga dagko ug gamhanan kay kaninyo. …
  • Deuteronomio 7:2
    Ug sa diha nga ang Ginoo nga inyong Dios magtugyan kanila nganha kaninyo ug inyong nalupig, kinahanglang laglagon ninyo sila sa hingpit. Ayaw kamo paghimo ug kasabotan uban kanila ug ayaw pagpakita ug kaluoy kanila.…
  • Deuteronomio 7:3
    Ayaw kamo pagpakigminyo kanila, nga maghatag sa inyong mga anak nga babaye ngadto sa ilang mga anak nga lalaki, o magkuha sa ilang mga anak nga babaye alang sa inyong mga anak nga lalaki.…
  • Deuteronomio 7:4
    Kay sila magpasimang sa inyong anak nga lalaki gikan sa pagsunod kanako, aron sa pag-alagad sa laing mga dios, unya ang kapungot sa Ginoo mosilaob batok kaninyo ug siya maglaglag dayon kaninyo. …
  • Deuteronomio 7:5
    Apan ingon niini ang buhata kanila: gub-a ninyo ang ilang mga halaran ug dugmoka ang ilang mga haligi ug pukana ang ilang Aserim ug sunoga sa kalayo ang ilang mga kinulit nga larawan.…
  • Deuteronomio 7:6
    “Kay kamo katawhan nga balaan ngadto sa Ginoo nga inyong Dios; ang Ginoo nga inyong Dios nagpili kaninyo aron mahimong usa ka katawhan nga iyang panag-iyahon gikan sa tanang mga katawhan nga anaa sa yuta. …
  • Deuteronomio 7:7
    Dili tungod kay daghan pa kamo sa gidaghanon kay sa ubang katawhan nga kamo gihigugma sa Ginoo ug iyang gipili kay kamo mao ang labing diyotay sa tanang katawhan, …
  • Deuteronomio 7:8
    Apan kini tungod kay ang Ginoo nahigugma kaninyo ug nagtuman sa panumpa nga iyang gipanumpa sa inyong mga katigulangan nga gikuha kamo sa Ginoo pinaagi sa gamhanang kamot ug gilukat kamo gikan sa balay sa kaulipnan, gikan sa kamot sa Paraon nga hari sa Ehipto.…
  • Deuteronomio 7:9
    Busa hibaloi ninyo nga ang Ginoo nga inyong Dios Dios gayod, ang matinumanon nga Dios nga nagtuman sa kasabotan ug sa gugma nga walay paglubad ngadto sa mga nahigugma kaniya ug nagtuman sa iyang mga sugo ngadto sa usa ka libo ka kaliwatan,…
  • Deuteronomio 7:10
    Ug nanimalos nganha sa ilang nawong sa mga nagdumot kaniya pinaagi sa paglaglag kanila. Siya dili maglangan niadtong nagdumot kaniya; siya magbalos kaniya nganha sa iyang nawong.…
  • Deuteronomio 7:11
    Busa pagbantay kamo sa pagbuhat sa sugo ug sa mga lagda ug sa mga tulumanon nga gisugo nako kaninyo niining adlawa.…
  • Deuteronomio 7:12
     “Ug tungod kay nagtagad kamo niining mga tulumanon ug nagbuhat niini, ang Ginoo nga inyong Dios magtuman diha kaninyo sa kasabotan ug sa gugmang walay paglubad nga gipanumpa niya nga tumanon ngadto sa inyong katigulangan. …
  • Deuteronomio 7:13
    Siya mahigugma kaninyo, ug magpanalangin kaninyo ug magpadaghan kaninyo. Magpanalangin usab siya sa bunga sa inyong lawas ug sa bunga sa inyong yuta, sa inyong trigo ug sa inyong bino ug sa inyong lana, sa nadugang sa inyong mga kahayopan ug sa mga nati sa panon sa inyong karnero didto sa yuta nga gipanumpa niya sa inyong katigulangan nga ihatag kaninyo. …
  • Deuteronomio 7:14
    Mabulahan kamo labaw sa tanang mga katawhan. Walay lalaki o babaye nga dili makaanak diha kaninyo o sa inyong kahayopan.…
  • Deuteronomio 7:15
    Ug kuhaon sa Ginoo gikan kaninyo ang tanang balatian ug walay bisan usa sa daotan nga sakit didto sa Ehipto nga inyong nahibaloan nga ipahamtang nganha kaninyo, apan ipahamtang niya kini nganha sa tanang magdumot kaninyo. …
  • Deuteronomio 7:16
    Ug laglagon ninyo ang tanang mga katawhan nga itugyan kaninyo sa Ginoo nga inyong Dios. Ang inyong mata dili maluoy kanila ug ayaw kamo pag-alagad sa ilang mga diosdios kay kana mahimong lit-ag alang kaninyo.…
  • Deuteronomio 7:17
    “Kon moingon kamo sa inyong kasingkasing, ‘Kini nga mga nasod mas dagko pa kay kanako, unsaon man nako sa pag-ilog kanila?’…
  • Deuteronomio 7:18
    Ayaw kamo kahadlok kanila hinuon hinumdomi ang gibuhat sa Ginoo nga inyong Dios ngadto sa Paraon ug sa tibuok nga Ehipto,…
  • Deuteronomio 7:19
    Ng dagkong mga pagsulay nga nakita sa inyong mga mata, ang mga ilhanan ug mga kahibulongan, ang gamhanang kamot ug ang bukton nga tinuy-od nga pinaagi niini gipagula kamo sa Ginoo nga inyong Dios, busa ingon niini ang buhaton sa Ginoo nga inyong Dios ngadto sa tanang mga katawhan nga inyong gikahadlokan.…
  • Deuteronomio 7:20
    Dugang pa, ang Ginoo nga inyong Dios magpadala ug mga putyokan sa taliwala nila, hangtod nga ang mga mahibilin ug ang mga magtago gikan kaninyo mangalaglag.…
  • Deuteronomio 7:21
    Ayaw kamo kahadlok kanila kay ang Ginoo nga inyong Dios anaa sa taliwala ninyo, ang Dios nga dako ug makalilisang. …
  • Deuteronomio 7:22
    Ang Ginoo nga inyong Dios maghawan niining mga nasod gikan sa inyong atubangan sa hinayhinay. Ayaw sila puoha dayon kay tingali unya ug ang mga mananap nga ihalas modaghan pag-ayo batok kaninyo. …
  • Deuteronomio 7:23
    Apan ang Ginoo nga inyong Dios magtugyan kanila nganha kaninyo, ug siya maglisang kanila pag-ayo hangtod nga mangalaglag sila.…
  • Deuteronomio 7:24
    Ug iyang itugyan ang ilang mga hari nganha sa inyong mga kamot ug laglagon ninyo ang ilang ngalan gikan sa ubos sa langit. Walay bisan kinsang tawo nga makahimo pag-asdang batok kaninyo hangtod nga malaglag ninyo sila.…
  • Deuteronomio 7:25
    Sunoga sa kalayo ang kinulit nga larawan sa ilang mga diosdios. Ayaw kaibgi ang plata o ang bulawan nga anaa kanila o kuhaon ninyo kini alang sa inyong kaugalingon, aron nga dili kamo malit-ag niini kay kini dulumtanan alang sa Ginoo nga inyong Dios.…
  • Deuteronomio 7:26
    Ug ayaw kamo pagdala ug usa ka dulumtanan nga butang nganha sa inyong balay ug mahimong usa ka tinunglo sama niini. Dumti ug kasilagi gayod kini kay kini tinunglo nga butang.…