Deuteronomio 5 | Holy Bible Words

Deuteronomio 5:1
Ug gipatawag ni Moises ang tibuok Israel ug giingnan sila, “Pamati O Israel, sa mga lagda ug sa mga tulumanon nga akong isulti sa inyong pangdungog niining adlawa ug tun-i ninyo kini ug matngoni ang pagbuhat niini.…
Deuteronomio 5:2
Ang Ginoo nga atong Dios nagbuhat ug kasabotan uban kanato didto sa Horeb.…
Deuteronomio 5:3
Dili uban sa atong katigulangan nga gibuhat sa Ginoo kining kasabotan, kondili kanatong tanan nga ania dinhi nga mga buhi niining adlawa.…
Deuteronomio 5:4
Ang Ginoo misulti kaninyo sa nawong ug nawong didto sa bukid gikan sa taliwala sa kalayo.…
Deuteronomio 5:5
Niadtong panahona ako nagtindog taliwala kaninyo ug sa Ginoo aron sa pagsulti kaninyo sa pulong sa Ginoo kay nangahadlok man kamo tungod sa kalayo, ug wala kamo motungas sa bukid. Siya miingon:…
Deuteronomio 5:6
‘Ako ang Ginoo nga inyong Dios nga nagkuha kaninyo gikan sa yuta sa Ehipto, gikan sa balay sa kaulipnan.…
Deuteronomio 5:7
“ ‘Ayaw kamo pagbaton ug laing mga dios sa akong atubangan.…
Deuteronomio 5:8
“ ‘Ayaw kamo pagbuhat alang kaninyo ug kinulit nga larawan, o bisan unsang dagway sa bisan unsang butang nga atua sa langit sa itaas o sa yuta sa ubos o sa tubig sa ilalom sa yuta.…
Deuteronomio 5:9
Ayaw kamo pagyukbo kanila o pag-alagad kanila kay ako ang Ginoo nga inyong Dios abubhoan nga Dios, nga nagsilot sa mga anak tungod sa pagkadaotan sa mga ginikanan ngadto sa ikatulo ug sa ikaupat nga kaliwatan sa mga nagdumot kanako. …
Deuteronomio 5:10
Apan nagpakita ako sa gugmang walay paglubad ngadto sa mga linibo nga nahigugma kanako ug nagtuman sa akong mga sugo.…
Deuteronomio 5:11
“ ‘Ayaw gamita sa walay pulos ang ngalan sa Ginoo nga inyong Dios kay ang Ginoo dili mag-isip nga walay sala kaniya nga naggamit sa iyang ngalan sa walay pulos.…
Deuteronomio 5:12
“ ‘Tumana ninyo ang adlaw nga igpapahulay aron sa pagbalaan niini sumala sa gisugo kaninyo sa Ginoo nga inyong Dios.…
Deuteronomio 5:13
Unom ka adlaw kamong magbuhat ug buhata ang tanan ninyong buluhaton.…
Deuteronomio 5:14
Apan ang ikapito nga adlaw usa ka adlaw nga igpapahulay ngadto sa Ginoo nga inyong Dios. Niini ayaw kamo pagbuhat ug bisan unsa nga buluhaton, kamo, ang inyong mga anak nga lalaki o ang inyong mga anak nga babaye o ang inyong mga sulugoon nga lalaki o ang inyong mga sulugoon nga babaye o ang inyong mga baka o ang inyong mga asno o bisan unsa sa inyong mga kahayopan o sa langyaw nga anaa sa sulod sa inyong mga ganghaan, aron makapahulay ang inyong mga sulugoon nga lalaki ug ang inyong mga sulugoon nga babaye ug kamo usab. …
Deuteronomio 5:15
Hinumdomi nga kaniadto mga ulipon kamo didto sa yuta sa Ehipto ug nga ang Ginoo nga inyong Dios nagkuha kaninyo gikan didto pinaagi sa gamhanang kamot ug bukton nga tinuy-od. Tungod niana ang Ginoo nga inyong Dios nagsugo kaninyo sa pagtuman sa adlaw nga igpapahulay.…
Deuteronomio 5:16
“ ‘Tahora ninyo ang inyong amahan ug ang inyong inahan sumala sa gisugo kaninyo sa Ginoo nga inyong Dios aron motaas ang inyong mga adlaw ug aron mamaayo kini kaninyo didto sa yuta nga ihatag kaninyo sa Ginoo nga inyong Dios.…
Deuteronomio 5:17
“ ‘Ayaw kamo pagpatay.…
Deuteronomio 5:18
“ ‘Ayaw usab kamo panapaw.…
Deuteronomio 5:19
“ ‘Ayaw usab kamo pangawat.…
Deuteronomio 5:20
“ ‘Ayaw usab kamo pagsaksi ug bakak batok sa inyong isigkatawo.…
Deuteronomio 5:21
“ ‘Ayaw usab kamo kaibog sa asawa sa inyong isigkatawo ug ayaw tinguhaa ang pag-angkon sa balay sa inyong isigkatawo o sa iyang yuta o sa iyang sulugoong lalaki o sa iyang sulugoong babaye o sa iyang baka o sa iyang asno o sa bisan unsang butang nga iya sa inyong isigkatawo.’…
Deuteronomio 5:22
“Kining mga pulonga gisulti sa Ginoo ngadto sa tibuok ninyong katilingban didto sa bukid, gikan sa taliwala sa kalayo, sa panganod ug sa hilabihan nga kangitngit uban sa kusog nga tingog ug wala na siyay gidugang. Ug kini gisulat niya sa duha ka papan nga bato ug gihatag kini kanako.…
Deuteronomio 5:23
“Ug sa diha nga nadungog ninyo ang tingog gikan sa taliwala sa kangitngit, samtang ang bukid nagdilaab sa kalayo, miduol kamo kanako, ang tanan nga mga pangulo sa inyong mga banay ug ang inyong mga kadagkoan.…
Deuteronomio 5:24
Ug miingon kamo, ‘Tan-awa, ang Ginoo nga atong Dios nagpakita kanato sa iyang himaya ug sa iyang pagkagamhanan ug atong nadungog ang iyang tingog gikan sa taliwala sa kalayo. Nakita nato niining adlawa nga ang Dios nakigsulti sa tawo ug ang tawo buhi gihapon.…
Deuteronomio 5:25
Busa karon nganong mangamatay man kita? Kay kining dakong kalayo molamoy man kanato. Mangamatay kita kon makadungog kita pag-usab sa tingog sa Ginoo nga atong Dios.…
Deuteronomio 5:26
Kay kinsa ba diha sa tanang tawo nga nakadungog sa tingog sa buhing Dios nga nagsulti gikan sa taliwala sa kalayo, sama sa atong nasinati ug nabuhi pa gihapon?…
Deuteronomio 5:27
Duol ug pamatia ang tanan nga isulti sa Ginoo nga atong Dios. Ug isulti kanamo ang tanan nga isulti kanimo sa Ginoo nga atong Dios ug mamati kami ug magbuhat niini.’…
Deuteronomio 5:28
Ug nadungog sa Ginoo ang inyong mga tingog sa dihang misulti kamo kanako, ug ang Ginoo miingon kanako, ‘Nadungog nako ang mga pulong niining katawhan nga ilang gisulti kanimo. Maayo ang ilang pagkasulti niadtong tanan nga ilang gipanulti.…
Deuteronomio 5:29
Aduna pa lamang unta silay hunahuna nga sama niini kanunay, sa pagkahadlok kanako ug sa pagtuman sa tanan nakong mga sugo, aron magmaayo ang ilang kahimtang ug sa ilang mga anak hangtod sa kahangtoran!…
Deuteronomio 5:30
Adtoa ug sultihi sila, “Pamauli kamo sa inyong mga tolda.”…
Deuteronomio 5:31
Apan ikaw, tindog tupad kanako ug sultihan ko ikaw sa tanan nga mga sugo ug mga lagda ug mga tulumanon nga itudlo nimo kanila, aron buhaton nila didto sa yuta nga gihatag nako kanila aron mapanag-iya.’ …
Deuteronomio 5:32
Busa pagmatngon kamo sa pagbuhat sumala sa gisugo kaninyo sa Ginoo nga inyong Dios. Ayaw kamo pagtipas ngadto sa tuo o ngadto sa wala.…
Deuteronomio 5:33
Lakaw kamo diha sa tanang dalan nga gisugo kaninyo sa Ginoo nga inyong Dios, aron mabuhi kamo ug mamaayo ang inyong kahimtang, ug aron mabuhi kamo ug dugay didto sa yuta nga inyong mapanag-iya.…