Holy Bible Words
Read The Bible Online

Deuteronomio 31

  • Deuteronomio 31:1
    Busa mipadayon si Moises sa pagsulti niining mga pulonga ngadto sa tibuok nga Israel. …
  • Deuteronomio 31:2
    Ug siya miingon kanila, “120 ka tuig na ako niining adlawa; dili na ako makahimo sa paggula ug pagsulod. Ang Ginoo miingon kanako, ‘Dili ka makatabok niining Jordan.’…
  • Deuteronomio 31:3
    Ang Ginoo nga inyong Dios mao gayod ang mag-una kaninyo. Laglagon niya kining mga nasod sa inyong atubangan aron inyo silang ilogan. Ug si Josue mao ang mangulo kaninyo sumala sa gisulti sa Ginoo. …
  • Deuteronomio 31:4
     Ug ang Ginoo maghimo ngadto kanila sama sa gibuhat niya kang Sihon ug kang Og, mga hari sa mga Amorihanon, ug ngadto sa yuta nila sa dihang gilaglag niya sila.…
  • Deuteronomio 31:5
    Ug ang Ginoo magtugyan kanila nganha sa inyong atubangan ug buhaton ninyo ngadto kanila sumala sa tanang sugo nga gisugo nako kaninyo. …
  • Deuteronomio 31:6
    Pagmalig-on kamo ug pagmadasigon. Ayaw kamo kahadlok ug ayaw kamo kalisang kanila kay ang Ginoo nga inyong Dios mao ang mag-uban kaninyo, dili siya mopakyas kaninyo o mobiya kaninyo.”…
  • Deuteronomio 31:7
    Unya gipatawag ni Moises si Josue ug giingnan kini sa atubangan sa tibuok nga Israel, “Pagmalig-on ug pagmadasigon, kay ikaw maoy mosulod uban niining katawhan ngadto sa yuta nga gipanumpa sa Ginoo ngadto sa ilang katigulangan aron ihatag kanila, ug ikaw magbutang kanila sa pagpanag-iya niini.…
  • Deuteronomio 31:8
     Ug ang Ginoo mao ang mag-una kanimo. Siya mag-uban kanimo, dili ikaw niya pakyason o biyaan. Ayaw kahadlok o kaluya.”…
  • Deuteronomio 31:9
    Ug gisulat ni Moises kini nga Balaod ug gihatag niya sa mga pari, sa mga kaliwat ni Levi nga nagdala sa sudlanan sa kasabotan sa Ginoo, ug sa tanang kadagkoan sa Israel. …
  • Deuteronomio 31:10
     Ug si Moises nagsugo kanila nga nag-ingon, “Human sa matag pito ka tuig, sa gitakdang panahon sa tuig sa pagpahigawas, sa Kasaulogan sa mga Balongbalong,…
  • Deuteronomio 31:11
    Sa dihang moduol ang tibuok Israel sa pagpakita diha sa atubangan sa Ginoo nga inyong Dios sa dapit nga iyang pilion, basaha kini nga Balaod sa atubangan sa tibuok Israel diha sa ilang pangdungog.…
  • Deuteronomio 31:12
    Tigoma ang katawhan, ang mga lalaki, ang mga babaye, ang mga bata ug ang mga langyaw nga anaa sa inyong mga lungsod aron sila makadungog ug makakat-on sa pagkahadlok sa Ginoo nga inyong Dios ug magmatngon sa pagbuhat sa tanang mga pulong niini nga Balaod, …
  • Deuteronomio 31:13
    Ug nga ang ilang mga anak nga wala mahibalo niini makadungog ug makakat-on sa pagkahadlok sa Ginoo nga inyong Dios, samtang kamo magpuyo sa yuta nga inyong adtoan sa tabok sa Jordan aron sa pagpanag-iya niini.”…
  • Deuteronomio 31:14
    Ang Ginoo miingon kang Moises, “Tan-awa, nagkaduol na ang mga adlaw nga ikaw mamatay. Tawga si Josue ug pangadto kamo sa tolda nga tagboanan aron ako maghatag kaniya sa katungdanan.” Ug sila si Moises ug si Josue nangadto ug nagpakita sa ilang kaugalingon didto sa tolda nga tagboanan. …
  • Deuteronomio 31:15
    Ug mitungha ang Ginoo didto sa Tolda pinaagi sa haligi nga panganod ug ang haligi nga panganod nagtindog sa pultahan sa Tolda.…
  • Deuteronomio 31:16
    Unya ang Ginoo miingon kang Moises, “Tan-awa, hapit na ikaw mopahulay uban sa imong mga amahan unya kining katawhan mosimba sa laing mga dios sa yuta nga maoy ilang adtoan aron makig-uban kanila, ug sila mobiya kanako ug molapas sa akong kasabotan nga gibuhat nako uban kanila.…
  • Deuteronomio 31:17
    Unya ang akong kapungot mosilaob batok kanila nianang adlawa ug ako mobiya kanila, ug tagoon nako ang akong nawong gikan kanila ug mangalaglag sila. Ug daghang kadaotan ug mga kagul-anan ang moabot kanila nga tungod niana moingon sila nianang adlawa, ‘Dili ba nga miabot kanato kining kadaotan tungod kay ang atong Dios wala mag-uban kanato?’ …
  • Deuteronomio 31:18
    Ug tagoon gayod nako ang akong nawong niadtong adlawa tungod sa tanang kadaotan nga ilang nabuhat kay mosimba sila sa laing mga dios.…
  • Deuteronomio 31:19
    Busa karon isulat ninyo kini nga awit ug itudlo kini sa katawhan sa Israel. Ibutang kini sa ilang mga baba aron kini nga awit mahimong saksi alang kanako batok sa katawhan sa Israel. …
  • Deuteronomio 31:20
    Kay sa diha nga madala na nako sila ngadto sa yuta, diin nag-agas ang gatas ug dugos, nga gipanumpa nako nga ihatag sa ilang katigulangan, ug sa makakaon na sila ug mabusog ug manambok, sila moadto sa laing mga dios ug mag-alagad kanila ug magtamay kanako ug maglapas sa akong kasabotan.…
  • Deuteronomio 31:21
    Ug sa diha nga moabot kanila ang daghang mga kadaotan ug mga kasamok, kini nga awit magpamatuod sa ilang atubangan ingon nga saksi kay kini dili kalimtan sa baba sa ilang kaliwatan, kay ako nahibalo sa ilang katuyoan nga ilang gihunahuna sa wala pa nako sila madala ngadto sa yuta nga akong gipanumpa nga ihatag.” …
  • Deuteronomio 31:22
    Sa mao nga adlaw gisulat ni Moises kini nga awit ug gitudlo kini ngadto sa katawhan sa Israel.…
  • Deuteronomio 31:23
    Ug ang Ginoo mihatag sa sugo kang Josue nga anak ni Nun ug miingon, “Pagmalig-on ug pagmadasigon, kay ikaw magdala sa mga anak ni Israel ngadto sa yuta nga gipanumpa nako nga ihatag kanila ug ako mag-uban kanimo.”…
  • Deuteronomio 31:24
    Sa nakahuman na si Moises pagsulat sa mga pulong niining Balaod diha sa usa ka basahon hangtod sa kataposan, …
  • Deuteronomio 31:25
    Gisugo ni Moises ang mga Levihanon nga nagdala sa sudlanan sa kasabotan sa Ginoo,…
  • Deuteronomio 31:26
    “Kuhaa ninyo kini nga basahon sa Balaod ug ibutang ninyo kini sa kilid sa sudlanan sa kasabotan sa Ginoo nga inyong Dios aron kini adto didto ingon nga saksi batok kaninyo.…
  • Deuteronomio 31:27
    Kay nahibalo ako kon unsa kamo ka masupilon ug ka gahi ug ulo. Tan-awa, samtang ako buhi pa uban kaninyo karong adlawa, nagmasupilon kamo batok sa Ginoo; unsa pa kaha human sa akong kamatayon! …
  • Deuteronomio 31:28
    Tigoma kanako ang tanan nga mga kadagkoan sa inyong mga banay ug ang inyong mga pangulo aron akong ikasulti kining mga pulonga ug sangpiton ang langit ug yuta aron sa pagsaksi batok kanila. …
  • Deuteronomio 31:29
    Kay nahibalo ako nga human sa akong kamatayon magbuhat gayod kamo ug daotan ug motipas kamo sa dalan nga akong gisugo kaninyo. Ug moabot kaninyo ang daotan sa umaabot nga mga adlaw tungod kay buhaton ninyo ang daotan diha sa panan-aw sa Ginoo, sa pagpasuko kaniya tungod sa buhat sa inyong mga kamot.”…
  • Deuteronomio 31:30
    Ug gisulti ni Moises diha sa pangdungog sa tibuok katilingban sa Israel ang mga pulong niini nga awit, hangtod nga nahuman sila.…