Deuteronomio 27 | Holy Bible Words

Deuteronomio 27:1
Unya si Moises ug ang mga kadagkoan sa Israel nagsugo sa katawhan nga nag-ingon, “Tumana ang tanang sugo nga akong gisugo kaninyo niining adlawa.…
Deuteronomio 27:2
Ug sa adlaw nga motabok kamo sa Jordan padulong sa yuta nga gihatag kaninyo sa Ginoo nga inyong Dios, pagtapok kamo ug mga dagkong bato ug bulita kini ug apog. …
Deuteronomio 27:3
Ug sulati kini sa tanang mga pulong niini nga Balaod, sa dihang motabok kamo aron sa pagsulod sa yuta nga gihatag kaninyo sa Ginoo nga inyong Dios, yuta diin nag-agas ang gatas ug dugos sumala sa saad kaninyo sa Ginoo nga Dios sa inyong katigulangan. …
Deuteronomio 27:4
Ug sa dihang makatabok na kamo sa Jordan, tapoka ninyo nianang adlawa didto sa bukid sa Ebal kining mga bato nga akong gisugo kaninyo ug buliti kini ug apog.…
Deuteronomio 27:5
Ug didto pagbuhat kamo ug halaran alang sa Ginoo nga inyong Dios, halaran nga bato. Ayaw kamo paggamit ug puthaw nga galamiton alang niini. …
Deuteronomio 27:6
Pinaagi sa mga bato nga tibuok pagbuhat kamo ug halaran ngadto sa Ginoo nga inyong Dios ug paghalad kamo sa ibabaw niini ug halad nga sunogon alang sa Ginoo nga inyong Dios. …
Deuteronomio 27:7
Ug paghalad kamo ug mga halad sa pakigdait ug pangaon kamo didto. Ug paglipay kamo sa atubangan sa Ginoo nga inyong Dios.…
Deuteronomio 27:8
Ug isulat ninyo sa tin-aw gayod diha sa mga bato ang tanang pulong niining Balaod.”…
Deuteronomio 27:9
Ug si Moises ug ang mga pari nga mga Levihanon miingon sa tibuok nga Israel, “Panghilom kamo ug pamati, O Israel! Niining adlawa nahimo kamong katawhan sa Ginoo nga inyong Dios.…
Deuteronomio 27:10
Busa tumana ninyo ang tingog sa Ginoo nga inyong Dios, magtuman sa iyang mga sugo ug sa iyang mga lagda nga akong gisugo kaninyo niining adlawa.”…
Deuteronomio 27:11
Niadtong adlawa nagsugo si Moises sa katawhan nga nag-ingon,…
Deuteronomio 27:12
“Kon makatabok na kamo sa Jordan, kini sila mobarog ibabaw sa bukid sa Gerisim aron sa pagpanalangin sa katawhan: si Simeon, si Levi, si Juda, si Isacar, si Jose ug si Benjamin.…
Deuteronomio 27:13
Ug kini sila mobarog sa ibabaw sa bukid sa Ebal alang sa pagtunglo: si Ruben, si Gad, si Aser, si Zabulon, si Dan ug si Neftali. …
Deuteronomio 27:14
Ug ang mga Levihanon mosulti ngadto sa tanang katawhan sa Israel pinaagi sa kusog nga tingog:…
Deuteronomio 27:15
“ ‘Tinunglo ang tawo nga magbuhat ug larawan nga kinulit o tinunaw, butang nga dulumtanan sa Ginoo, butang nga binuhat sa kamot sa hanas nga tigpamuhat ug magbutang niini sa tago!’ Ug ang tanang katawhan mag-ingon, ‘Amen!’…
Deuteronomio 27:16
‘Tinunglo ang dili motahod sa iyang amahan o sa iyang inahan!’ Ug ang tanang katawhan moingon, ‘Amen!’…
Deuteronomio 27:17
‘Tinunglo ang magbalhin sa utlanan sa iyang isigkatawo.’ Ug ang tanang katawhan moingon, ‘Amen!’…
Deuteronomio 27:18
“ ‘Tinunglo ang mopahisalaag sa tawong buta diha sa dalan.’ Ug ang tanang katawhan moingon, ‘Amen!’…
Deuteronomio 27:19
“ ‘Tinunglo ang magtuis sa hustisya nga alang sa langyaw, sa wala nay amahan ug sa biyuda!’ Ug ang tanang katawhan moingon, ‘Amen!’…
Deuteronomio 27:20
“ ‘Tinunglo ang makighilawas sa asawa sa iyang amahan kay nagpakaulaw siya sa iyang amahan!’ Ug ang tanang katawhan moingon, ‘Amen!’…
Deuteronomio 27:21
“ ‘Tinunglo ang makighilawas sa bisan unsang mananap.’ Ug ang tanang katawhan moingon, ‘Amen!’…
Deuteronomio 27:22
“ ‘Tinunglo ang makighilawas sa iyang igsoong babaye, anak sa iyang amahan o anak sa iyang inahan.’ Ug ang tanang katawhan moingon, ‘Amen!’…
Deuteronomio 27:23
“ ‘Tinunglo ang makighilawas sa iyang ugangang babaye.’ Ug ang tanang katawhan moingon, ‘Amen!’ …
Deuteronomio 27:24
‘Tinunglo ang mopatay sa iyang isigkatawo sa hilom.’ Ug ang tanang katawhan moingon, ‘Amen!’…
Deuteronomio 27:25
“ ‘Tinunglo ang modawat ug suborno aron sa pagpatay sa usa ka tawo nga walay sala.’ Ug ang tanang katawhan moingon, ‘Amen!’…
Deuteronomio 27:26
“ ‘Tinunglo ang dili mouyon sa mga pulong niini nga Balaod aron sa pagtuman niini.’ Ug ang tanang katawhan moingon, ‘Amen!’…