Holy Bible Words
Read The Bible Online

Deuteronomio 24

  • Deuteronomio 24:1
     “Sa diha nga ang usa ka tawo magpili ug asawa ug mangasawa kaniya, unya kon kini wala makapahimuot kaniya tungod kay may nakaplagan siya nga dili maayo sa maong babaye, magsulat siya kaniya ug sulat sa pagpakigbulag ug ihatag niya kini sa iyang kamot ug papahawaon siya gikan sa iyang balay. …
  • Deuteronomio 24:2
    Ug kon molakaw siya ug maasawa sa laing lalaki…
  • Deuteronomio 24:3
    Ug ang ikaduhang bana masilag kaniya ug magsulat kaniya ug sulat sa pagpakigbulag ug ihatag kini sa iyang kamot ug papahawaon niya siya sa iyang balay o kon mamatay ang ikaduhang bana nga mikuha kaniya aron maasawa siya,…
  • Deuteronomio 24:4
    Ang iyang unang bana nga naghingilin kaniya dili makakuha kaniya pag-usab aron maasawa human siya mahugawi, kay kini dulumtanan sa atubangan sa Ginoo, ug ayaw dad-i ug sala ang yuta nga gihatag kanimo sa Ginoo nga imong Dios ingon nga panulundon.…
  • Deuteronomio 24:5
    “Sa diha nga ang usa ka tawo bag-ong naminyo, dili siya makalakaw uban sa kasundalohan, dili usab siya matugyanan ug bisan unsang patigayon. Magpuyo siya sa iyang balay nga walay katungdanan sa usa ka tuig nga magmalipayon uban sa iyang asawa nga iyang gipili.…
  • Deuteronomio 24:6
    “Kinahanglang walay tawo nga mokuha sa galingan o sa ligsanan sa galingan ingon nga garantiya kay sama ra nga iyang gikuha ang kinabuhi ingon nga garantiya.…
  • Deuteronomio 24:7
     “Kon ang usa ka tawo masakpan nga nanagit sa usa sa iyang mga igsoon sa katawhan sa Israel, ug kon nag-isip siya niini ingon nga ulipon o iyang gibaligya, ang nagdagit patyon. Sa ingon niini puohon ninyo ang daotan sa inyong taliwala.…
  • Deuteronomio 24:8
    Pagbantay sa sakit nga sanla ug pagmatngon sa pagbuhat sumala sa tanan nga itudlo kaninyo sa mga pari nga Levihanon, sumala sa akong gisugo kanila pagmatngon kamo sa pagbuhat niini.…
  • Deuteronomio 24:9
    Hinumdomi ang gibuhat sa Ginoo nga inyong Dios kang Miriam didto sa dalan sa inyong paggula gikan sa Ehipto.…
  • Deuteronomio 24:10
     “Sa diha nga magpahulam ikaw sa imong isigkatawo sa bisan unsang paagi sa paghulam, ayaw pag-adto sa iyang balay aron sa pagkuha sa garantiya.…
  • Deuteronomio 24:11
    Tindog sa gawas ug ang tawo nga imong gipahulam magdala sa garantiya nganha kanimo. …
  • Deuteronomio 24:12
    Ug kon siya usa ka tawong kabos, ayaw pagkatulog uban sa iyang garantiya.…
  • Deuteronomio 24:13
    Iuli kaniya ang garantiya sa dihang mosalop ang adlaw aron matulog siya sa iyang bisti ug magpanalangin kanimo. Ug kini mahimong pagkamatarong alang kanimo sa atubangan sa Ginoo nga imong Dios.…
  • Deuteronomio 24:14
    “Ayaw daogdaoga ang usa ka sinuholan nga ulipon nga kabos ug nagkinahanglan, bisan siya usa sa imong mga igsoon o usa sa mga langyaw nga anaa sa imong yuta sulod sa inyong mga lungsod.…
  • Deuteronomio 24:15
    Ihatag kaniya ang iyang suhol sa adlaw nga iya kining gihagoan sa dili pa mosalop ang adlaw kay siya kabos ug ang iyang kasingkasing nagsalig niini, kay tingali unya ug mosangpit siya sa Ginoo batok kanimo ug kini mahimong sala diha kanimo.…
  • Deuteronomio 24:16
    “Ang mga amahan kinahanglang dili patyon tungod sa mga anak, o ang mga anak patyon tungod sa mga amahan. Ang matag usa patyon tungod sa iyang kaugalingong sala.…
  • Deuteronomio 24:17
     “Ayaw tuisa ang hustisya nga angay sa langyaw o sa mga wala nay amahan o kuhaon ang bisti sa biyuda ingon nga garantiya. …
  • Deuteronomio 24:18
    Apan kinahanglan nga imong hinumdoman nga naulipon ikaw didto sa Ehipto ug gikan didto gilukat ikaw sa Ginoo nga imong Dios. Busa nagsugo ako kanimo sa pagbuhat niini.…
  • Deuteronomio 24:19
     “Sa diha nga mag-ani ikaw sa imong mga uhay sa imong uma ug nakalimot ikaw sa usa ka bugkos nga uhay didto sa uma, ayaw pagbalik aron sa pagkuha niini, kini iya na sa langyaw, sa wala nay amahan ug sa biyuda aron panalanginan ikaw sa Ginoo nga imong Dios sa tanang buhat sa imong mga kamot. …
  • Deuteronomio 24:20
    Sa dihang mag-uyog ikaw sa imong mga olibo, ayaw sublii pagpanguha ang mga sanga; kini alang na sa langyaw, sa wala nay amahan ug sa biyuda.…
  • Deuteronomio 24:21
    Sa diha nga manguha ikaw sa mga bunga sa imong parasan, ayaw kini hagdawi pagkahuman, kini alang sa langyaw, sa wala nay amahan ug sa biyuda.…
  • Deuteronomio 24:22
    Hinumdomi nga naulipon ikaw didto sa yuta sa Ehipto busa nagsugo ako kanimo sa pagbuhat niini.…