2 Samuel 5 | Holy Bible Words

2 Samuel 5:1
Unya ang tanang banay sa Israel miadto kang David sa Hebron ug miingon, “Tan-awa, kami imong bukog ug unod. …
2 Samuel 5:2
Sa mga panahon nga nangagi sa diha nga si Saul mao pa ang hari sa ibabaw namo, ikaw mao ang nagmando sa paggula ug sa pagsulod sa Israel, ug ang Ginoo miingon kanimo, ‘Ikaw mahimong tigbantay sa akong katawhan nga Israel ug ikaw ang mahimong pangulo sa Israel.’ ” …
2 Samuel 5:3
Busa ang tanang mga kadagkoan sa Israel miadto sa hari didto sa Hebron ug si Hari David naghimo ug usa ka kasabotan uban kanila didto sa Hebron sa atubangan sa Ginoo ug sila nagdihog kang David ingon nga hari sa Israel. …
2 Samuel 5:4
Si David 30 ka tuig ang panuigon sa diha nga siya misugod sa paghari, ug siya naghari sulod sa 40 ka tuig.…
2 Samuel 5:5
Didto sa Hebron siya naghari ibabaw sa Juda sulod sa pito ka tuig ug unom ka bulan; ug didto sa Jerusalem siya naghari sulod sa katloan ug tulo ka tuig ibabaw sa tibuok nga Israel ug Juda.…
2 Samuel 5:6
Unya ang hari ug ang iyang mga tawo miadto sa Jerusalem batok sa mga Jebusihanon, ang mga nagpuyo sa yuta nga miingon kang David, “Dili ikaw makasulod dinhi, bisan ang buta ug ang bakol mopasibog kanimo,” kay naghunahuna man sila, “si David dili makaanhi dinhi.” …
2 Samuel 5:7
Bisan pa niana giilog ni David ang kuta sa Zion, nga mao ang siyudad ni David.…
2 Samuel 5:8
Ug si David miingon niadtong adlawa, “Si bisan kinsa nga mosulong sa mga Jebusihanon, paadtoa siya ngadto sa agianan sa tubig aron sulongon ang bakol ug ang buta, nga gikaligutgotan sa kalag ni David.” Busa sila miingon, “Ang buta ug ang bakol kinahanglang dili moanhi sa balay.”…
2 Samuel 5:9
Ug si David mipuyo didto sa kuta, ug gitawag kini nga siyudad ni David. Ug gitukod ni David ang siyudad libot niini sukad sa Milo pasulod.…
2 Samuel 5:10
Ug si David nag-anam ug kabantogan kay ang Ginoo, ang Dios sa mga panon nag-uban man kaniya.…
2 Samuel 5:11
Si Hiram nga hari sa Tiro nagpadala ug mga sinugo ngadto kang David, ug mga kahoy nga cedro, ug mga panday ug mga kantero ug si David ilang gibuhatan ug balay.…
2 Samuel 5:12
Ug nasabot ni David nga ang Ginoo mao ang naghimo kaniya nga hari ibabaw sa Israel, ug nga iyang gibayaw ang iyang gingharian tungod ug alang sa iyang katawhan nga Israel.…
2 Samuel 5:13
Unya si David mikuha ug dugang nga mga puyopuyo ug mga asawa alang kaniya gikan sa Jerusalem human siya moabot gikan sa Hebron, ug nadugangan ang iyang mga anak nga lalaki ug mga anak nga babaye nga nangatawo kang David. …
2 Samuel 5:14
Ug kini mao ang mga ngalan niadtong mga natawo kaniya didto sa Jerusalem: si Samua, si Sobab, si Natan, si Solomon,…
2 Samuel 5:15
Si Ibhar, si Elisua, si Nefeg, si Jafia,…
2 Samuel 5:16
Si Elisama, si Eliada ug si Elifelet.…
2 Samuel 5:17
Sa diha nga ang mga Filistihanon nakadungog nga si David gidihogan ingon nga hari sa Israel, ang tanang mga Filistihanon mitungas aron sa pagpangita kang David, apan si David nakadungog niini ug miadto siya sa kuta. …
2 Samuel 5:18
Karon ang mga Filistihanon nangadto ug nagkatag diha sa walog sa Refaim.…
2 Samuel 5:19
Ug si David nagpakisayod sa Ginoo, “Motungas ba ako batok sa mga Filistihanon? Itugyan ba nimo sila sa akong kamot?” Ug ang Ginoo miingon kang David, “Tungas, kay itugyan gayod nako ang mga Filistihanon nganha sa imong kamot.”…
2 Samuel 5:20
Unya si David miadto sa Baal-perasim ug gibuntog sila ni David didto, ug siya miingon, “Ang Ginoo nagbungkag sa akong mga kaaway sa akong atubangan sama sa nagbuswak nga mga katubigan.” Busa ang maong dapit gitawag ug Baal-perasim. …
2 Samuel 5:21
Ug didto gibiyaan sa mga Filistihanon ang ilang mga diosdios, ug si David ug ang iyang mga tawo midala niini.…
2 Samuel 5:22
Ang mga Filistihanon miabot pa gayod pag-usab ug nagkatag sa ilang kaugalingon diha sa walog sa Refaim. …
2 Samuel 5:23
Sa diha nga si David nagpakisayod sa Ginoo, siya miingon, “Ikaw dili motungas, lipot ngadto sa ilang luyo, ug asdanga sila atbang sa mga kahoy nga balsamo.…
2 Samuel 5:24
Ug sa diha nga ikaw makadungog ug dinahunog sa paglakaw didto sa ibabaw sa mga kahoy nga balsamo, pangandam sa imong kaugalingon, kay niana ang Ginoo nag-una kanimo aron sa pagbuntog sa kasundalohan sa mga Filistihanon.” …
2 Samuel 5:25
Ug si David naghimo sa ingon, sumala sa gisugo sa Ginoo kaniya, ug gibuntog ang mga Filistihanon, sukad sa Geba hangtod sa Geser.…