2 Samuel 21 | Holy Bible Words

2 Samuel 21:1
Niadtong tungora dihay usa ka gutom sa panahon ni David sulod sa tulo ka tuig nga nagsunod-sunod ug si David nagpakitambag sa Ginoo. Ug ang Ginoo miingon, “Adunay kasal-anan si Saul ug ang iyang banay tungod kay iyang gipamatay ang mga Gibeonhanon.”…
2 Samuel 21:2
Busa gitawag sa hari ang mga Gibeonhanon ug misulti siya kanila. Ang mga Gibeonhanon dili sakop sa katawhan sa Israel apan salin sa mga Amorihanon. Bisan ug ang katawhan sa Israel nanumpa sa pagpalingkawas kanila, si Saul naninguha sa pagpatay kanila tungod sa iyang mainitong pagbati alang sa katawhan sa Israel ug sa Juda.…
2 Samuel 21:3
Ug si David miingon sa mga Gibeonhanon, “Unsay akong buhaton alang kaninyo? Ug asa nako himoa ang pagtabon sa sala aron inyong kapanalanginan ang kabilin sa Ginoo?” …
2 Samuel 21:4
Ug ang mga Gibeonhanon miingon kaniya, “Kini dili butang mahitungod sa salapi o bulawan taliwala kanamo ug kang Saul ug sa iyang banay o alang kanato sa pagpatay ug usa ka tawo dinhi sa Israel.” Ug siya miingon, “Unsay inyong isulti nga buhaton nako alang kaninyo?” …
2 Samuel 21:5
Sila miingon sa hari, “Ang tawo nga nag-ut-ot kanamo ug naglaraw sa paglaglag kanamo, aron kami wala nay dapit diha sa tibuok nga kayutaan sa Israel, …
2 Samuel 21:6
itugot nga ang pito sa iyang mga anak nga lalaki itugyan kanamo ug sila among bitayon alang sa Ginoo didto sa Gibea ni Saul, ang pinili sa Ginoo.” Ug ang hari miingon, “Itugyan nako sila.”…
2 Samuel 21:7
Apan ang hari mipalingkawas kang Mefiboset nga anak ni Jonatan nga anak ni Saul, tungod sa panumpa sa Ginoo nga diha sa taliwala nila, taliwala ni David ug ni Jonatan nga anak ni Saul.…
2 Samuel 21:8
Apan gikuha sa hari ang duha ka anak nga lalaki ni Rispa nga anak ni Aia, nga iyang gipanganak kang Saul, si Armoni ug si Mefiboset, ug ang lima ka anak nga lalaki ni Merab, nga anak nga babaye ni Saul, nga iyang gipanganak kang Adriel nga anak ni Barsilai, nga Meholatihanon. …
2 Samuel 21:9
Ug sila gitugyan niya ngadto sa mga kamot sa mga Gibeonhanon ug sila gibitay nila didto sa bukid sa atubangan sa Ginoo ug nangapukan pagdungan silang pito. Gipamatay sila sulod sa unang mga adlaw sa pag-ani, sa sinugdan sa pag-ani sa sebada.…
2 Samuel 21:10
Unya si Rispa nga anak ni Aiah mikuha ug bisti nga sako ug gibukhad kini alang kaniya sa ibabaw sa bato, sukad sa sinugdan sa ting-ani hangtod nga ang ulan nangahulog diha kanila gikan sa kalangitan. Ug siya wala motugot nga ang mga langgam sa kalangitan motugdon kanila sa adlaw o ang mga mananap sa kapatagan sa gabii. …
2 Samuel 21:11
Sa diha nga si David gisuginlan kon unsay gibuhat ni Rispa nga anak ni Aiah, nga puyopuyo ni Saul,…
2 Samuel 21:12
Si David miadto ug mikuha sa mga bukog ni Saul ug sa mga bukog ni Jonatan nga iyang anak gikan sa mga tawo sa Jabes-gilead nga mikawat niini gikan sa plasa sa Bet-san, diin ang mga Filistihanon mibitay kanila, sa adlaw nga ang mga Filistihanon mipatay kang Saul didto sa Gilboa. …
2 Samuel 21:13
Ug iyang gidala gikan didto ang mga bukog ni Saul ug ang mga bukog ni Jonatan nga iyang anak ug ilang gitigom ang mga bukog nila nga gipangbitay.…
2 Samuel 21:14
Ilang gilubong ang mga bukog ni Saul ug ni Jonatan nga iyang anak didto sa yuta ni Benjamin sa Zela, sa lubnganan ni Kis nga iyang amahan, ug ilang gihimo ang tanang gisugo sa hari. Ug human niana, ang Dios nagtubag sa ilang mga pag-ampo alang sa yuta.…
2 Samuel 21:15
Ug ang mga Filistihanon nakiggubat pag-usab batok sa Israel, ug si David milugsong kuyog sa iyang mga sulugoon ug sila nakig-away batok sa mga Filistihanon. Ug si David nagkaluya na.…
2 Samuel 21:16
Ug si Isbi-benob, usa sa mga kaliwat sa mga higanti, nga ang bangkaw may kabug-aton nga tulo ka gatos ka siklo nga bronsi ug nagtakin sa usa ka bag-ong espada, naghunahuna sa pagpatay kang David.…
2 Samuel 21:17
Apan si Abisai nga anak ni Zeruia mitabang kaniya ug mitigbas sa Filistihanon ug mipatay kaniya. Unya ang mga tawo ni David nagmando kaniya, “Ikaw dili na mouban kanamo sa gubat kay tingali unya ug mapalong nimo ang suga sa Israel.”…
2 Samuel 21:18
Human niini, may gubat na usab batok sa mga Filistihanon didto sa Gob. Unya gipatay ni Sibecai nga Husatihanon si Saf, ang usa sa mga kaliwat sa mga higanti.…
2 Samuel 21:19
Ug may lain na usab nga gubat batok sa mga Filistihanon didto sa Gob ug gipatay ni Elhanan nga anak ni Jaareoregim nga taga-Betlehem si Goliat; nga Gitihanon, nga ang puloan sa iyang bangkaw sama sa likisan sa hablanan. …
2 Samuel 21:20
Ug may gubat na usab didto sa Gat, diin adunay usa ka tawo nga dako ug lawas, nga may unom ka tudlo sa tagsa niya ka kamot, ug may unom ka tudlo sa matag tiil niya. 24 ang gidaghanon, ug gikan usab siya sa kaliwat sa mga higanti. …
2 Samuel 21:21
Sa dihang gibugalbugalan niya ang Israel, si Jonatan nga anak ni Simeas nga igsoon ni David mipatay kaniya. …
2 Samuel 21:22
Kining upat nga napatay kaliwat sa mga higanti didto sa Gat, ug sila nangapukan pinaagi sa kamot ni David ug pinaagi sa kamot sa iyang mga sulugoon.…