2 Mga Hari 1 | Holy Bible Words

2 Mga Hari 1:1
Human sa kamatayon ni Ahab, ang Moab mialsa batok sa Israel.…
2 Mga Hari 1:2
Unya si Ahasias nahulog sa bintana sa iyang lawak sa itaas didto sa Samaria, ug nasakit siya. Busa nagpadala siya ug mga sinugo ug miingon kanila, “Lakaw ug pangutan-a si Baalsebub, ang dios sa Ekron, kon mamaayo ba ako niining sakita.”…
2 Mga Hari 1:3
Apan ang anghel sa Ginoo miingon kang Elias nga Tisbihanon, “Tindog ug tungas aron sugaton nimo ang mga sinugo sa hari sa Samaria ug ingna sila, ‘Tungod ba kay walay Dios sa Israel, maoy hinungdan nga kamo moadto aron magpakisayod kang Baalsebub, ang dios sa Ekron?’…
2 Mga Hari 1:4
Busa karon mao kini ang gisulti sa Ginoo, ‘Ikaw dili na makakanaog gikan sa higdaanan nga imong gihigdaan kondili mamatay gayod ikaw.’ ” Ug si Elias milakaw.…
2 Mga Hari 1:5
Ang mga sinugo namalik ngadto sa hari ug siya miingon kanila, “Nganong namalik man kamo?”…
2 Mga Hari 1:6
Ug sila miingon kaniya, “May usa ka tawo nga misugat kanamo ug miingon kanamo, ‘Balik kamo ngadto sa hari nga nagpadala kaninyo ug ingna siya, ‘Kini mao ang giingon sa Ginoo: Tungod ba kay walay Dios sa Israel, maoy hinungdan nga ikaw nagpadala aron sa pagpakisayod kang Baalsebub, ang dios sa Ekron? Busa ikaw dili na makakanaog gikan sa higdaanan nga imong gihigdaan, kondili mamatay gayod ikaw.’ ” …
2 Mga Hari 1:7
Ug siya miingon kanila, “Unsang matanga sa tawo ang misugat kaninyo ug misugilon kaninyo niining mga pulonga?” …
2 Mga Hari 1:8
Sila mitubag kaniya, “Siya balhiboon ug nagbakos ug usa ka bakos nga panit diha sa iyang hawak.” Ug siya miingon, “Kadto mao si Elias nga Tisbihanon.”…
2 Mga Hari 1:9
Unya ang hari nagpadala ngadto kaniya ug usa ka pangulo sa tag-50 uban sa iyang 50 ka tawo. Ug siya mitungas ngadto kang Elias nga naglingkod sa tumoy sa bungtod ug miingon kaniya, “O tawo sa Dios, ang hari miingon, ‘Lugsong!’ ” …
2 Mga Hari 1:10
Apan si Elias mitubag sa pangulo sa tag-50, “Kon ako usa ka tawo sa Dios, pakanaogon unta ang kalayo gikan sa langit ug lamyon ikaw ug ang imong 50 ka tawo.” Ug dihay kalayo nga mikanaog gikan sa langit ug gilamoy siya ug ang iyang 50 ka tawo.…
2 Mga Hari 1:11
Ug ang hari nagpadala pag-usab ug laing pangulo sa tag-50 uban sa iyang 50 ka tawo. Ug siya mitungas ug miingon kaniya, “O tawo sa Dios, mao kini sugo sa hari, ‘Pagdali ug lugsong!’ ” …
2 Mga Hari 1:12
Apan si Elias mitubag kanila, “Kon ako usa ka tawo sa Dios, pakanaogon unta ang kalayo gikan sa langit, ug ikaw lamyon ug ang imong 50 ka tawo.” Ug ang kalayo sa Dios mikanaog gikan sa langit ug gilamoy siya ug ang iyang 50 ka tawo.…
2 Mga Hari 1:13
Ug nagpadala na usab ang hari sa ikatulo nga pangulo sa tag-50 uban sa iyang 50 ka tawo. Ug ang ikatulo nga pangulo sa tag-50 mitungas ug miabot ug miluhod sa atubangan ni Elias ug naghangyo kaniya, “O tawo sa Dios, ako naghangyo kanimo, himoon unta nimo nga ang akong kinabuhi ug ang kinabuhi niining 50 nga imong mga sulugoon bililhon sa imong panan-aw. …
2 Mga Hari 1:14
Tan-awa, ang kalayo mikanaog gikan sa langit ug milamoy sa duha ka naunang pangulo sa tag-50 uban sa ilang mga tag-50 apan karon himoon unta nimo nga ang akong kinabuhi bililhon sa imong panan-aw.”…
2 Mga Hari 1:15
Unya ang anghel sa Ginoo miingon kang Elias, “Lugsong uban kaniya; ayaw kahadlok kaniya.” Ug siya mitindog ug milugsong uban kaniya ngadto sa hari,…
2 Mga Hari 1:16
g miingon kaniya, “Mao kini ang giingon sa Ginoo, ‘Tungod kay ikaw nagpadala ug mga sinugo aron sa pagpakisayod kang Baalsebub, ang dios sa Ekron,—tungod ba kay walay Dios sa Israel nga pakisayran sa iyang pulong?—busa ikaw dili makakanaog gikan sa higdaanan nga imong gihigdaan, kondili mamatay gayod ikaw.’ ”…
2 Mga Hari 1:17
Busa siya namatay sumala sa pulong sa Ginoo nga gipamulong pinaagi kang Elias. Ug si Jehoram nga iyang igsoon nahimong hari puli kaniya sa ikaduha nga tuig ni Jehoram nga anak ni Jehosafat, ang nga hari sa Juda, tungod kay si Ahasias walay anak nga lalaki.…
2 Mga Hari 1:18
Karon ang uban nga mga buhat ni Ahasias nga iyang nahimo, wala ba kini masulat sa basahon sa mga Kasaysayan sa mga Hari sa Israel?…