1 Samuel 8 | Holy Bible Words

1 Samuel 8:1
Unya sa diha nga si Samuel tigulang na, gihimo niya ang iyang mga anak nga lalaki nga mga maghuhukom sa Israel. …
1 Samuel 8:2
Ang ngalan sa iyang kamagulangan mao si Joel ug si Abiha ang ngalan sa ikaduha. Sila mao ang mga maghuhukom sa Beer-seba. …
1 Samuel 8:3
Apan ang iyang mga anak wala mosubay sa iyang mga pamaagi, kondili misimang ngadto sa pagpanapi. Nanawat sila ug suborno ug nagtuis sa hustisya.…
1 Samuel 8:4
Unya ang tanang kadagkoan sa Israel nagtigom ug nangadto kang Samuel didto sa Rama,…
1 Samuel 8:5
Ug sila miingon kaniya, “Ikaw tigulang na ug ang imong mga anak wala mosubay sa imong mga pamaagi. Busa pagpili alang kanamo ug usa ka hari nga maoy mangulo kanamo sama sa ubang mga nasod.”…
1 Samuel 8:6
Apan kini wala makapahimuot kang Samuel sa diha nga sila nag-ingon, “Hatagi kami ug usa ka hari nga maoy mangulo kanamo.” Ug si Samuel nag-ampo sa Ginoo,…
1 Samuel 8:7
Ug ang Ginoo miingon kang Samuel, “Pamatia ang tingog sa katawhan sa tanan nga ilang gisulti kanimo kay sila wala magsalikway kanimo, hinuon nagsalikway sila kanako sa akong paghari kanila.…
1 Samuel 8:8
Sumala sa tanang buhat nga ilang gihimo kanako, sukad sa adlaw nga ako nagkuha kanila gikan sa Ehipto hangtod niining adlawa nga ila akong gisalikway ug nag-alagad sa laing mga dios, mao usab ang ilang gihimo nganha kanimo. …
1 Samuel 8:9
Busa pamatia ang ilang tingog. Hinuon, pasidan-i sila pag-ayo ug saysayi sila sa mga pamaagi sa hari nga magmando kanila.”…
1 Samuel 8:10
Busa si Samuel misugilon sa tanang gisulti sa Ginoo ngadto sa katawhan nga nangayo kaniya ug usa ka hari.…
1 Samuel 8:11
Siya miingon, “Kini mao ang mga pamaagi sa hari nga maghari kaninyo: kuhaon niya ang inyong mga anak nga lalaki ug ibutang niya sila diha sa iyang mga karwahi ug mga tigpangabayo, ug mag-una sila sa iyang mga karwahi;…
1 Samuel 8:12
Ug siya magpili alang kaniya ug mga pangulo sa linibo ug mga pangulo sa tag-50 ug ang uban magdaro sa iyang yuta ug mag-ani sa iyang alanihon; ang uban tigbuhat ug mga kasangkapan sa gubat ug mga kasangkapan sa iyang mga karwahi.…
1 Samuel 8:13
Siya maghimo sa inyong mga anak nga babaye nga tigbuhat ug pahumot ug tigluto ug tighimo ug pan.…
1 Samuel 8:14
Iyang kuhaon ang labing maayo sa inyong mga uma ug parasan ug kaolibohan, ug maghatag niini ngadto sa iyang mga alagad. …
1 Samuel 8:15
Siya magkuha sa ikapulo nga bahin sa inyong ani ug sa inyong parasan, ug maghatag niini ngadto sa iyang mga pangulo sa kasundalohan ug sa iyang mga alagad. …
1 Samuel 8:16
Iyang kuhaon ang inyong mga sulugoon nga lalaki ug mga sulugoon nga babaye ug ang labing maayo sa inyong mga baka ug mga asno, ug magbutang kanila sa iyang buluhaton. …
1 Samuel 8:17
Siya magkuha ug ikapulo nga bahin sa inyong mga panon sa karnero; ug kamo mahimo niyang mga ulipon. …
1 Samuel 8:18
Ug nianang adlawa magtuaw kamo tungod sa hari nga inyong gipili alang kaninyo, apan ang Ginoo dili motubag kaninyo nianang adlawa.”…
1 Samuel 8:19
Apan ang katawhan nagdumili sa pagpamati sa tingog ni Samuel ug sila miingon, “Dili! Kinahanglan nga adunay hari ibabaw kanamo,…
1 Samuel 8:20
Aron kami usab mahisama unta sa ubang nasod, ug nga ang among hari magmando ug mangulo kanamo sa pagpakig-away sa among mga gubat.” …
1 Samuel 8:21
Human mabati ni Samuel ang mga pulong sa katawhan, iya kining gisugilon pag-usab sa mga igdulungog sa Ginoo.…
1 Samuel 8:22
Ug ang Ginoo miingon kang Samuel, “Pamatia ang ilang tingog ug paghimo ug hari alang kanila.” Ug si Samuel miingon sa mga tawo sa Israel, “Pamauli ang matag tawo ngadto sa iyang siyudad.”…