1 Samuel 3 | Holy Bible Words

1 Samuel 3:1
Ang bata nga si Samuel nag-alagad sa Ginoo ubos sa pagdumala ni Eli. Ug ang pulong sa Ginoo talagsa ra niadtong mga adlawa ug dili kanunay ang panan-awon.…
1 Samuel 3:2
Niadtong panahona, si Eli, nga ang mga mata nagsugod na sa pagkahalap nga tungod niana dili na siya makakita, naghigda sa iyang lawak. …
1 Samuel 3:3
Ang lampara sa Dios wala pa mapalong ug si Samuel naghigda sa sulod sa Templo sa Ginoo, diin didto ang sudlanan sa kasabotan sa Dios.…
1 Samuel 3:4
Unya ang Ginoo mitawag, “Samuel! Samuel!” Ug siya mitubag, “Ania ako.”…
1 Samuel 3:5
Ug siya midagan ngadto kang Eli ug miingon, “Ania ako kay ikaw nagtawag kanako.” Apan siya miingon, “Wala ako magtawag kanimo. Balik ug higda.” Busa milakaw siya ug mihigda. …
1 Samuel 3:6
Ang Ginoo mitawag pag-usab, “Samuel!” Si Samuel mibangon ug miadto kang Eli ug miingon, “Ania ako kay ikaw nagtawag kanako.” Ug siya mitubag, “Wala ako magtawag kanimo, anak; higda pag-usab.”…
1 Samuel 3:7
Niining tungora si Samuel wala pa makaila sa Ginoo, ug ang pulong sa Ginoo wala pa ikapadayag diha kaniya.…
1 Samuel 3:8
Ang Ginoo mitawag pag-usab kang Samuel sa ikatulong higayon. Ug siya mibangon ug miadto kang Eli ug miingon, “Ania ako kay ikaw nagtawag kanako.” Ug si Eli nakasabot nga ang bata gitawag sa Ginoo. …
1 Samuel 3:9
Busa si Eli miingon kang Samuel, “Lakaw, higda ug kon siya magtawag kanimo, ikaw moingon ‘Sulti, Ginoo, kay ang imong sulugoon mamati.’ ” Busa si Samuel milakaw ug mihigda sa iyang dapit.…
1 Samuel 3:10
Unya ang Ginoo mitungha ug mitindog nga nagtawag sama sa unang mga higayon, “Samuel! Samuel!” Ug si Samuel miingon, “Sulti, kay ang imong sulugoon mamati.”…
1 Samuel 3:11
Ug ang Ginoo miingon kang Samuel, “Hapit na nako buhaton sa Israel ang usa ka butang, nga ang duha ka dalunggan sa makabati niini mobagting.…
1 Samuel 3:12
Nianang adlawa buhaton nako batok kang Eli ang tanan nga akong gisulti mahitungod sa iyang panimalay, gikan sa sinugdanan hangtod sa kataposan. …
1 Samuel 3:13
Kay ako nagsulti kaniya nga ang iyang panimalay hapit na nako silotan hangtod sa kahangtoran tungod sa ilang sala nga iyang nahibaloan, kay ang iyang mga anak nga lalaki nagpasipala sa Dios ug wala siya magpugong kanila. …
1 Samuel 3:14
Busa ako nanumpa ngadto sa panimalay ni Eli nga ang ilang sala dili mabayran pinaagi sa inihaw o sa halad hangtod sa kahangtoran.”…
1 Samuel 3:15
Si Samuel mihigda hangtod sa buntag. Unya giablihan niya ang mga pultahan sa balay sa Ginoo. Si Samuel nahadlok sa pagsugilon kang Eli sa panan-awon. …
1 Samuel 3:16
Apan si Eli mitawag kang Samuel ug miingon, “Samuel, anak ko.” Ug siya miingon, “Ania ako.”…
1 Samuel 3:17
Ug si Eli miingon, “Unsa man ang gisulti niya kanimo? Ayaw kana ililong kanako. Ang Dios maghimo unta sa ingon nganha kanimo ug labi pa gayod usab kon ikaw maglilong sa bisan unsa gikan kanako sa tanang mga butang nga iyang gisulti kanimo.”…
1 Samuel 3:18
Busa si Samuel misugilon kaniya sa tanan ug walay gitago nga bisan unsa gikan kaniya. Ug si Eli miingon, “Siya mao ang Ginoo, ug ipabuhat kaniya kon unsay maayo alang kaniya.”…
1 Samuel 3:19
Si Samuel mitubo ug ang Ginoo nag-uban kaniya ug walay nakawang sa tanan niyang gisulti. …
1 Samuel 3:20
Ug ang tibuok Israel gikan sa Dan ngadto sa Beer-seba nahibalo nga si Samuel napamatud-an nga propeta sa Ginoo. …
1 Samuel 3:21
Ang Ginoo mipakita pag-usab didto sa Silo tungod kay siya nagpadayag sa iyang kaugalingon ngadto kang Samuel pinaagi sa pulong sa Ginoo.…