1 Samuel 21 | Holy Bible Words

1 Samuel 21:1
Unya si David miadto sa Nob ngadto kang Ahimelek nga pari. Ug si Ahimelek nagkurog nga misugat kang David ug miingon kaniya, “Nganong nag-inusara ka ug walay tawo nga mikuyog kanimo?” …
1 Samuel 21:2
Si David miingon kang Ahimelek nga pari, “Ang hari nagsugo kanako ug usa ka buluhaton ug miingon kanako, ‘Walay usa ka tawo nga mahibalo mahitungod sa butang nga niini ako nagpadala ug nagsugo kanimo.’ Naghimo ako ug kasabotan uban sa mga batan-ong lalaki mahitungod sa usa ka dapit. …
1 Samuel 21:3
Busa karon unsay anaa sa imong kamot? Hatagi ako ug lima ka buok pan o bisan unsa nga anaa.”…
1 Samuel 21:4
Ug ang pari mitubag kang David, “Walay naandan nga pan nga ania sa akong kamot, apan may balaan nga pan kon ang mga batan-ong lalaki nagpalayo pa lamang gikan sa mga babaye.”…
1 Samuel 21:5
Ug si David mitubag sa pari, “Sa pagkatinuod ang mga babaye gipahilayo gikan kanamo kanunay kon ako adunay panaw. Ang mga sudlanan sa mga batan-ong lalaki ginahin bisan sa usa ka naandan nga panaw, unsa pa kaha ka ginahin ang ilang mga sudlanan karon?”…
1 Samuel 21:6
Busa ang pari mihatag kaniya sa balaan nga pan kay walay laing pan didto gawas sa pan nga nahimutang sa atubangan sa Dios, nga gikuha gikan sa atubangan sa Ginoo, aron ilisan ug init nga pan sa adlaw nga kini kuhaon.…
1 Samuel 21:7
Karon dihay usa ka tawo sa mga sulugoon ni Saul nga didto niadtong adlawa nga gihawiran sa atubangan sa Ginoo, ug ang iyang ngalan mao si Doeg nga Edomhanon, ang pangulo sa tanang tigbantay sa kahayopan ni Saul.…
1 Samuel 21:8
Si David miingon kang Ahimelek, “Wala bay bangkaw o espada sa imong kamot? Kay wala ako makadala sa akong espada o sa akong mga hinagiban tungod kay ang buluhaton sa hari dinalian.”…
1 Samuel 21:9
Ug ang pari miingon, “Ang espada ni Goliat, ang Filistihanon nga imong gipatay didto sa walog sa Ela ania dinhi, giputos ug panapton sa luyo sa ephod, kon imo kanang dad-on kuhaa kana kay walay lain dinhi gawas niana.” Ug si David miingon, “Walay lain sama niana, ihatag kana kanako.”…
1 Samuel 21:10
Unya si David mitindog ug mipalayo niadtong adlawa gikan kang Saul, ug miadto kang Akis nga hari sa Gat. …
1 Samuel 21:11
Ug ang mga sulugoon ni Akis miingon kaniya, “Dili ba kini mao si David nga hari sa yuta? Wala ba sila mag-awit kaniya ngadto sa usa ug usa sa ilang pagsayaw, ‘Si Saul nakapatay sa iyang mga linibo, ug si David sa iyang mga tagnapulo ka libo’?”…
1 Samuel 21:12
Ug gitipigan ni David kining mga pulonga sa iyang kasingkasing, ug nahadlok siya pag-ayo kang Akis nga hari sa Gat. …
1 Samuel 21:13
Busa iyang giusab ang iyang mga kagawian sa ilang atubangan, ug nagpakaaron-ingnon siya nga buang diha sa mga kamot nila ug nagsulatsulat sa mga pultahan sa ganghaan ug nagpatabisay sa iyang laway diha sa iyang bungot.…
1 Samuel 21:14
Unya miingon si Akis ngadto sa iyang mga sulugoon, “Tan-awa, nakita ninyo nga ang tawo nabuang, busa ngano nga inyo pa mang gidala siya nganhi kanako?…
1 Samuel 21:15
Nakulangan ba ako ug buang nga mga tawo nga inyong gidala kining tawhana aron sa pagbuhat ug binuang sa akong atubangan? Kinahanglan ba nga kining tawhana moanhi sa akong balay?”…