1 Samuel 2 | Holy Bible Words

1 Samuel 2:1
Unya si Hana nag-ampo ug miingon, “Ang akong kasingkasing naghimaya diha sa Ginoo; ang akong kusog nabayaw diha sa Ginoo. Ang akong baba nagtamay sa akong mga kaaway, kay nalipay man ako sa imong pagluwas.…
1 Samuel 2:2
Walay laing balaan sama sa Ginoo, walay lain gawas kanimo; walay laing bato sama sa atong Dios.…
1 Samuel 2:3
Ayaw na pagsulti sa hilabihan nga pagkamapahitas-on, ayaw pagulaa gikan sa imong baba ang pagkagarboso; kay ang Ginoong Dios sa kahibalo, ug pinaagi kaniya ang mga buhat gitimbang.…
1 Samuel 2:4
Ang mga pana sa mga kusgan nangabali, apan ang mga huyang nalig-on.…
1 Samuel 2:5
Kadtong mga busog nagpasuhol sa ilang kaugalingon aron makakaon, apan kadtong gigutom, wala na gutoma. Siya nga dili manganak nanganak ug pito apan siya nga daghan ug mga anak nawad-an ug paglaom.…
1 Samuel 2:6
Ang Ginoo mopatay ug mohatag pagbalik sa kinabuhi; siya mobanlod ngadto sa Sheol ug magbanhaw.…
1 Samuel 2:7
Ang Ginoo maghimo sa tawo nga kabos ug dato; siya ang mopaubos sa tawo, siya usab ang motuboy.…
1 Samuel 2:8
Siya magbangon sa kabos gikan sa abog; siya magtuboy sa timawa gikan sa tapok sa abo, aron palingkoron sila uban sa mga pangulo, ug manunod sa trono sa himaya. Kay ang mga haligi sa yuta iya sa Ginoo, ug diha niini iyang gipahimutang ang kalibotan.…
1 Samuel 2:9
“Siya magbantay sa mga tiil sa mga matinud-anon; apan ang daotan mangahanaw diha sa kangitngitan; kay dili pinaagi sa kusog nga ang tawo magmadaogon.…
1 Samuel 2:10
Kadtong makigbatok sa Ginoo, mangapusgay; batok kanila siya modahunog diha sa langit. Ang Ginoo maghukom sa tibuok kalibotan; maghatag siya ug kalig-on sa iyang hari, ug magbayaw sa gahom sa iyang dinihogan.”…
1 Samuel 2:11
Unya si Elkana mipauli ngadto sa iyang balay sa Rama. Ug ang bata nag-alagad sa Ginoo uban sa pari nga si Eli.…
1 Samuel 2:12
Ang mga anak nga lalaki ni Eli mga tawong walay kapuslanan, sila walay pagtahod sa Ginoo.…
1 Samuel 2:13
Ang nabatasan sa mga pari ngadto sa katawhan mao nga kon may maghalad ug inihawng mananap, ang sulugoon sa pari moduol samtang gipabukalan pa ang unod dala ang tinidor nga may tulo ka ngipon, …
1 Samuel 2:14
Ug iyang itugsok kini sa kaha o sa kaldero o sa kawa o sa kolon, ug ang tanan nga madala sa tinidor maiya sa pari. Ingon niana ang gibuhat nila sa mga Israelinhon nga moadto didto sa Silo. …
1 Samuel 2:15
Dugang pa, sa dili pa sunogon ang tambok, ang sulugoon sa pari moduol ug moingon sa tawo nga naghalad, “Hatagi ug unod ang pari aron isugba, kay dili siya modawat ug linat-an nga unod, kondili hilaw.”…
1 Samuel 2:16
Kon ang tawo moingon kaniya, “Ipasunog nila ang tambok pag-una, unya makahimo na ikaw sa pagkuha kutob sa imong gitinguha” siya moingon, “Dili, kinahanglan nga ihatag nimo kini kanako karon, kay kon dili, pugson nako kini pagkuha.” …
1 Samuel 2:17
Ug ang sala sa mga batan-ong lalaki hilabihan kadako sa panan-aw sa Ginoo kay ilang gitamay ang halad ngadto sa Ginoo.…
1 Samuel 2:18
Si Samuel nag-alagad sa atubangan sa Ginoo, nagsul-ob siya ug ephod nga lino.…
1 Samuel 2:19
Ang iyang inahan naghimo kaniya ug bisti ug dad-on niya kini matag tuig inig-adto niya ug sa iyang bana aron paghalad sa tinuig nga halad. …
1 Samuel 2:20
Unya si Eli nagpanalangin kang Elkana ug sa iyang asawa ug miingon, “Ang Ginoo maghatag unta kanimo ug mga anak pinaagi niining babaye tungod sa gasa nga inyong gitugyan ngadto sa Ginoo.” Ug unya namauli sila ngadto sa ilang kaugalingong balay.…
1 Samuel 2:21
Ang Ginoo nagtan-aw kang Hana ug siya nagsamkon ug nanganak pa ug tulo ka lalaki ug duha ka anak nga babaye. Ug ang bata nga si Samuel nagtubo sa atubangan sa Ginoo.…
1 Samuel 2:22
Niining higayona si Eli tigulang na kaayo ug nadungog niya ang tanan nga gibuhat sa iyang mga anak nga lalaki sa tibuok Israel, ug giunsa nila sa pagdulog sa mga babaye nga nag-alagad didto sa ganghaan sa tolda nga tagboanan.…
1 Samuel 2:23
Ug siya miingon kanila, “Nganong naghimo kamo nianang mga butanga? Kay nadungog nako ang inyong daotang mga binuhatan gikan sa tanang katawhan.…
1 Samuel 2:24
Mga anak ko, dili maayo ang balita nga akong nadungog nga mikaylap diha sa katawhan sa Ginoo.…
1 Samuel 2:25
Kon ang usa ka tawo makasala batok sa laing tawo, ang Dios magpataliwala alang kaniya, apan kon ang usa ka tawo makasala batok sa Ginoo, kinsa may magpataliwala alang kaniya?” Bisan pa niana, sila wala mamati sa tingog sa ilang amahan tungod kay maoy kabubut-on sa Ginoo ang pagpatay kanila.…
1 Samuel 2:26
Karon ang bata nga si Samuel nagpadayon sa pagtubo sa gidak-on ug diha sa kahimuot sa Ginoo ug sa mga tawo.…
1 Samuel 2:27
Dihay usa ka tawo sa Dios nga miadto kang Eli ug miingon, “Mao kini ang giingon sa Ginoo, ‘Nagpakita ako sa akong kaugalingon ngadto sa balay sa imong amahan sa didto pa sila sa Ehipto, sa dihang ulipon pa sila sa balay sa Paraon.…
1 Samuel 2:28
Nagpili ako kaniya gikan sa tanang banay sa Israel aron mahimo nga akong pari, sa pag-adto sa halaran, sa pagsunog ug insenso, ug sa pagsul-ob ug ephod sa akong atubangan. Ug gihatag nako sa balay sa imong amahan ang tanang mga halad nga gihimo pinaagi sa kalayo gikan sa katawhan sa Israel.…
1 Samuel 2:29
Nganong gitamay ninyo ang mga inihaw ug mga halad alang kanako nga akong gisugo, ug nagpasidungog sa imong mga anak nga lalaki labaw kay kanako pinaagi sa pagpatambok sa inyong kaugalingon sa mga piniling bahin sa matag halad sa akong katawhan nga Israel?’…
1 Samuel 2:30
Busa ang Ginoo, ang Dios sa Israel nagpahayag, ‘Akong gisaad nga ang imong panimalay ug ang panimalay sa imong amahan mosulod ug mogawas sa akong atubangan hangtod sa kahangtoran,’ apan karon ang Ginoo nagpahayag, ‘Ipalayo kana kanako, kay sila nga nagpasidungog kanako akong pasidunggan, ug sila nga nagtamay kanako tamayon. …
1 Samuel 2:31
Moabot ang adlaw nga akong putlon ang imong kusog ug ang kusog sa balay sa imong amahan aron wala nay matigulang sa imong panimalay. …
1 Samuel 2:32
Unya diha sa kasubo masina ikaw nga magsud-ong sa tanang kauswagan nga ihatag sa Dios sa Israel, ug wala nay matigulang sa imong panimalay hangtod sa kahangtoran. …
1 Samuel 2:33
Ang usa kaninyo nga dili nako kuhaon gikan sa akong halaran, ilikay nako sa mga paghilak ug sa kagul-anan ug ang tanan nga sakop sa imong panimalay mamatay pinaagi sa espada. …
1 Samuel 2:34
Kining mahitabo sa imong duha ka anak nga lalaki nga si Hopni ug si Pinehas mao ang ilhanan kanimo. Silang duha mamatay sa mao rang adlaw. …
1 Samuel 2:35
Magpabarog ako alang sa akong kaugalingon ug usa ka matinumanon nga pari, nga magbuhat sumala sa anaa sa akong kasingkasing ug hunahuna. Ako magtukod alang kaniya ug usa ka lig-on nga balay, ug siya mosulod ug mogawas sa atubangan sa akong dinihogan hangtod sa kahangtoran.…
1 Samuel 2:36
Si bisan kinsa nga mahibilin sa imong panimalay moadto aron mangayo kaniya ug plata o usa ka buok pan ug moingon, “Naghangyo ako kanimo, ibutang ako sa usa sa mga luna sa pari aron ako makakaon ug tipik sa pan.” ’ ”…