Holy Bible Words
Read The Bible Online

1 Mga Hari 22

  • 1 Mga Hari 22:1
    Sulod sa tulo ka tuig nagpadayon nga walay gubat tali sa Siria ug sa Israel. …
  • 1 Mga Hari 22:2
    Apan sa ikatulo nga tuig, si Jehosafat nga hari sa Juda, miadto sa hari sa Israel.…
  • 1 Mga Hari 22:3
    Ug ang hari sa Israel miingon sa iyang mga sulugoon, “Nahibalo ba kamo nga ang Ramot-gilead atoa ug kita nagpakahilom ug wala kini nato kuhaa gikan sa kamot sa hari sa Siria?” …
  • 1 Mga Hari 22:4
    Ug siya miingon kang Jehosafat, “Mouban ba ikaw kanako aron sa pagpakiggubat didto sa Ramot-gilead?” Ug si Jehosafat miingon sa hari sa Israel, “Ako sama kanimo, ang akong katawhan ingon sa imong katawhan, ang akong mga kabayo ingon sa imong mga kabayo.”…
  • 1 Mga Hari 22:5
    Unya si Jehosafat miingon sa hari sa Israel, “Pagpakisayod una sa pulong sa Ginoo.”…
  • 1 Mga Hari 22:6
    Unya gitigom sa hari sa Israel ang mga propeta, mga upat ka gatos ka tawo, ug giingnan sila, “Moadto ba ako sa Ramot-gilead aron sa pagpakiggubat o pasagdan ba lamang nako kini?” Ug sila miingon, “Tungas kay ang Ginoo magtugyan niini ngadto sa kamot sa hari.”…
  • 1 Mga Hari 22:7
    Apan si Jehosafat miingon, “Wala bay lain nga propeta sa Ginoo dinhi nga atong pakisayran?”…
  • 1 Mga Hari 22:8
    Ug ang hari sa Israel miingon kang Jehosafat, “Ania pay usa ka tawo nga pinaagi kaniya magpakisayod kita mahitungod sa Ginoo, si Micaias nga anak ni Imla, apan nagdumot ako kaniya, kay wala siya magpropesiya ug maayo mahitungod kanako, kondili daotan.” Ug si Jehosafat miingon, “Dili unta magsulti ang hari sa ingon.”…
  • 1 Mga Hari 22:9
    Unya ang hari sa Israel mitawag ug usa ka tinugyanan ug miingon, “Dad-a dayon dinhi si Micaias nga anak ni Imla.”…
  • 1 Mga Hari 22:10
    Niadtong tungora, ang hari sa Israel ug si Jehosafat nga hari sa Juda naglingkod sa ilang mga trono, nagsul-ob sa ilang bisti nga harianon, didto sa giokanan duol sa ganghaan sa Samaria ug ang tanang propeta nagpropesiya sa ilang atubangan. …
  • 1 Mga Hari 22:11
    Ug si Zedekias nga anak ni Kenaana naghimo alang kaniya ug mga sungay nga puthaw ug miingon, “Kini mao ang gipamulong sa Ginoo, ‘Pinaagi niini sungayon nimo ang mga Sirianhon hangtod nga sila malaglag.’ ” …
  • 1 Mga Hari 22:12
    Ug ang tanang mga propeta nagpropesiya sa ingon ug nag-ingon, “Tungas ngadto sa Ramot-gilead ug pagmadaogon kay ang Ginoo magtugyan niini ngadto sa kamot sa hari.”…
  • 1 Mga Hari 22:13
    Ug ang sulugoon nga miadto aron sa pagtawag kang Micaias misulti kaniya, “Tan-awa, ang mga pulong sa mga propeta naghiusa sa pagpadayag sa maayo alang sa hari. Ako naghangyo kanimo, himoa nga ang imong pulong sama sa pulong sa usa kanila ug magsulti ikaw ug maayo.”…
  • 1 Mga Hari 22:14
    Ug si Micaias miingon, “Ingon nga ang Ginoo buhi, unsay isulti sa Ginoo kanako, kini maoy akong isulti.” …
  • 1 Mga Hari 22:15
    Ug sa pag-adto niya sa hari, ang hari miingon kaniya, “Micaias, moadto ba kami sa Ramot-gilead aron sa pagpakiggubat o pasagdan ba lamang namo kini?” Ug siya mitubag, “Tungas ug pagmadaogon, ug ang Ginoo maghatag niini ngadto sa kamot sa hari.” …
  • 1 Mga Hari 22:16
    Apan ang hari miingon kaniya, “Makapila ko ba ikaw hangyoon nga magsulti ikaw kanako sa matuod diha sa ngalan sa Ginoo?” …
  • 1 Mga Hari 22:17
     Ug siya miingon, “Akong nakita ang tibuok Israel nga nagkatibulaag sa ibabaw sa kabukiran, sama sa mga karnero nga walay tigbantay. Ug ang Ginoo miingon, ‘Kini walay agalon, papaulia nga malinawon ang matag usa ngadto sa iyang balay.’ ” …
  • 1 Mga Hari 22:18
    Ug ang hari sa Israel miingon kang Jehosafat, “Wala ba ako magsugilon kanimo nga siya dili buot magpropesiya ug maayo mahitungod kanako, kondili daotan?”…
  • 1 Mga Hari 22:19
     Ug si Micaias miingon, “Busa pamatia ang pulong sa Ginoo: Akong nakita ang Ginoo nga naglingkod sa iyang trono ug ang tanang panon sa langit nagtindog tupad kaniya sa iyang tuo ug sa iyang wala.…
  • 1 Mga Hari 22:20
    Ug ang Ginoo miingon, ‘Kinsa ang modani kang Ahab, aron moadto ug mapukan didto sa Ramot-gilead?’ Ug ang usa namulong niini ug ang lain namulong niana. …
  • 1 Mga Hari 22:21
    Unya may migula nga usa ka espiritu ug mitindog sa atubangan sa Ginoo ug miingon, ‘Ako ang modani kaniya.’…
  • 1 Mga Hari 22:22
    Ug ang Ginoo miingon kaniya, ‘Sa unsang paagi?’ Ug siya miingon, ‘Ako moadto ug magpakabakakon nga espiritu sa baba sa tanan niyang mga propeta.’ Ug siya miingon, ‘Ikaw mao ang modani kaniya ug magmalamposon. Lakaw ug buhata kini.’ …
  • 1 Mga Hari 22:23
    Busa tan-awa, ang Ginoo nagbutang ug usa ka bakakong espiritu sa baba sa tanan nimong mga propeta ug ang Ginoo nagsulti ug daotan mahitungod kanimo.”…
  • 1 Mga Hari 22:24
    Unya si Zedekias nga ang anak ni Kenaanan miduol ug misagpa kang Micaias sa aping ug miingon, “Giunsa pagbiya sa Espiritu sa Ginoo gikan kanako aron sa pagpakigsulti kanimo?” …
  • 1 Mga Hari 22:25
    Ug si Micaias miingon, “Makita na unya nimo nianang adlawa, sa diha nga ikaw moadto sa kinasuloran nga lawak aron sa pagtago sa imong kaugalingon.” …
  • 1 Mga Hari 22:26
    Ug ang hari sa Israel miingon, “Dakpa si Macaias ug dad-a siya ngadto kang Ammon nga gobernador sa siyudad ug kang Joas nga anak sa hari, …
  • 1 Mga Hari 22:27
    Ug ingna, ‘Mao kini ang gisulti sa hari, “Ibutang kining tawhana sa bilanggoan ug hatagi lamang siya ug gamayng pan ug diyotayng tubig, hangtod sa akong pagbalik nga malinawon.” ’ ”…
  • 1 Mga Hari 22:28
    Ug si Micaias miingon, “Kon ikaw mobalik nga malinawon, ang Ginoo wala magsulti pinaagi kanako.” Ug siya miingon, “Pamati kamo, kamong tanang katawhan!”…
  • 1 Mga Hari 22:29
    Busa ang hari sa Israel ug si Jehosafat nga hari sa Juda mitungas ngadto sa Ramot-gilead.…
  • 1 Mga Hari 22:30
    Ug ang hari sa Israel miingon kang Jehosafat, “Ako magtakoban sa akong kaugalingon ug moadto sa gubat. Apan magsul-ob ikaw sa imong mga bisti nga harianon.” Busa ang hari sa Israel nagtakoban sa iyang kaugalingon ug miadto sa gubat. …
  • 1 Mga Hari 22:31
    Unya ang hari sa Siria nagsugo sa 32 ka pangulo sa iyang mga karwahi, nga nag-ingon, “Ayaw pagpakig-away batok sa gamay o sa dako, gawas lamang sa hari sa Israel.” …
  • 1 Mga Hari 22:32
    Ug sa pagkakita sa mga pangulo sa mga karwahi kang Jehosafat, sila miingon, “Mao na gayod kini ang hari sa Israel.” Busa sila miatubang aron sa pagpakig-away batok kaniya ug si Jehosafat misinggit.…
  • 1 Mga Hari 22:33
    Ug sa pagkakita sa mga pangulo sa mga karwahi nga kadto dili diay ang hari sa Israel, wala sila mopadayon sa paggukod kaniya.…
  • 1 Mga Hari 22:34
    Apan may usa ka tawo nga nanaghap pagpana ug naigo ang hari sa Israel sa tinakdoan sa iyang taming sa dughan, busa siya miingon sa nagdala sa iyang karwahi, “Balik ug dad-a ako palayo gikan sa gubat kay ako samaran.” …
  • 1 Mga Hari 22:35
    Ug ang gubat misamot kainit niadtong adlawa ug ang hari nagsandig sa iyang karwahi nga nag-atubang sa Sirianhanon hangtod nga namatay siya sa pagkagabii, ug ang dugo sa samad miagay ngadto sa ilalom sa karwahi. …
  • 1 Mga Hari 22:36
    Ug dihay usa ka singgit gikan sa tibuok kasundalohan sa hapit na mosalop ang adlaw, “Ang matag tawo ngadto sa iyang siyudad, ug ang matag tawo ngadto sa iyang yuta!”…
  • 1 Mga Hari 22:37
    Busa ang hari namatay ug gidala ngadto sa Samaria ug ilang gilubong ang hari didto sa Samaria.…
  • 1 Mga Hari 22:38
    Ug ilang gihugasan ang karwahi didto sa linaw sa Samaria ug gitilaan sa mga iro ang iyang dugo ug ang mga babaye nga nagbaligya sa ilang dungog nangaligo niini, sumala sa pulong sa Ginoo nga iyang gisulti.…
  • 1 Mga Hari 22:39
    Ang uban nga mga buhat ni Ahab ug ang tanan niyang gibuhat ug ang balay nga iyang hinimo gikan sa mga tango sa elepante ug ang tanang mga siyudad nga iyang gitukod, wala ba kini masulat sa basahon sa mga Cronicas sa mga Hari sa Israel?…
  • 1 Mga Hari 22:40
    Busa si Ahab mipahulay uban sa iyang katigulangan ug si Ahasias nga iyang anak naghari puli kaniya.…
  • 1 Mga Hari 22:41
    Si Jehosafat nga anak ni Asa nagsugod sa paghari sa Juda sa ikaupat nga tuig ni Ahab nga hari sa Israel.…
  • 1 Mga Hari 22:42
    Si Jehosafat 35 ka tuig ang panuigon sa pagsugod niya paghari ug siya naghari sulod sa 25 ka tuig didto sa Jerusalem. Ug ang ngalan sa iyang inahan mao si Asuba nga anak ni Silhi.…
  • 1 Mga Hari 22:43
    Naglakaw siya diha sa tanang dalan sa iyang amahan nga si Asa, ug wala gayod mosimang gikan niini, nagbuhat sa matarong atubangan sa Ginoo, apan ang mga habog nga dapit wala makuha ug ang katawhan naghalad pa gihapon ug nagsunog ug insenso diha sa mga habog nga dapit.…
  • 1 Mga Hari 22:44
    Ug si Jehosafat nakigdait usab uban sa hari sa Israel.…
  • 1 Mga Hari 22:45
    Karon ang uban nga mga buhat ni Jehosafat ug ang gahom nga iyang gipakita ug giunsa niya pagpakiggubat, wala ba kini masulat diha sa basahon sa mga Cronicas sa mga Hari sa Juda? …
  • 1 Mga Hari 22:46
    Ug ang nahibilin sa mga lalaki nga nagbaligya sa ilang dungog nga nagpabilin sa mga adlaw sa iyang amahan nga si Asa iyang gipuo gikan sa yuta.…
  • 1 Mga Hari 22:47
    Walay hari sa Edom. Usa ka tinugyanan ang naghari. …
  • 1 Mga Hari 22:48
    Si Jehosafat naghimo ug mga barko sa Tarsis aron sa pag-adto sa Ofir sa pagkuha ug bulawan. Apan wala sila makaadto, kay ang mga barko nangaguba didto sa Esion-geber. …
  • 1 Mga Hari 22:49
    Unya si Ahasias nga anak ni Ahab miingon kang Jehosafat, “Paubana ang akong mga sulugoon sa imong mga sulugoon diha sa mga barko.” Apan si Jehosafat wala mouyon. …
  • 1 Mga Hari 22:50
    Ug si Jehosafat mipahulay uban sa iyang katigulangan ug gilubong uban sa iyang katigulangan didto sa siyudad ni David nga iyang amahan ug si Jehoram nga iyang anak naghari puli kaniya.…
  • 1 Mga Hari 22:51
    Si Ahasias nga anak ni Ahab nagsugod paghari sa Israel didto sa Samaria sa ikanapulo ug pito nga tuig ni Jehosafat nga hari sa Juda, ug siya naghari sa Israel sulod sa duha ka tuig.…
  • 1 Mga Hari 22:52
    Ug siya naghimo ug daotan atubangan sa Ginoo ug naglakaw diha sa dalan sa iyang amahan ug sa dalan sa iyang inahan ug sa dalan ni Jeroboam nga anak ni Nebat nga naghimo sa Israel sa pagpakasala.…
  • 1 Mga Hari 22:53
    Ug siya nag-alagad kang Baal ug nagsimba kaniya ug naghagit sa Ginoo, ang Dios sa Israel, sa pagkasuko sama sa tanang gibuhat sa iyang amahan.…