Holy Bible Words
Read The Bible Online

1 Mga Hari 2

  • 1 Mga Hari 2:1
    Sa diha nga ang panahon ni David nagkaduol na nga siya mamatay, iyang gitugon si Solomon nga iyang anak nga nag-ingon,…
  • 1 Mga Hari 2:2
    Ako hapit na moadto sa agianan sa tibuok kalibotan. Pagmalig-on ug ipakita ang imong pagkalalaki, …
  • 1 Mga Hari 2:3
    Ug tumana ang sugo sa Ginoo nga imong Dios, magsubay sa iyang mga dalan ug magtuman sa iyang mga lagda, sa iyang mga sugo, sa iyang mga tulumanon ug sa iyang mga pagpamatuod, sumala sa nasulat sa Balaod ni Moises, aron ikaw magmauswagon sa tanan nimong buhaton ug sa bisan asa ikaw moadto,…
  • 1 Mga Hari 2:4
    Aron tumanon sa Ginoo ang iyang gipamulong mahitungod kanako, nga nag-ingon, ‘Kon ang imong mga anak magmatngon sa ilang dalan, maglakaw nga magmatinumanon sa atubangan nako sa tibuok nilang kasingkasing ug sa tibuok nilang kalag, walay makulang kanimo nga usa ka tawo diha sa trono sa Israel.’…
  • 1 Mga Hari 2:5
    “Dugang pa, ikaw nahibalo usab sa gibuhat kanako ni Joab nga anak ni Zeruia, kon unsa ang iyang gibuhat sa duha ka tigmando sa kasundalohan sa Israel, kang Abner nga anak ni Ner ug kang Amasa nga anak ni Jether, nga iyang gipamatay ug gipaagas niya ang dugo sa gubat panahon sa pakigdait ug gibutang ang dugo sa gubat sa ibabaw sa iyang bakos nga diha sa iyang hawak ug sa iyang mga sandalyas nga diha sa iyang mga tiil.…
  • 1 Mga Hari 2:6
    Busa buhat sumala sa imong kaalam ug ayaw itugot nga ang iyang ubanon nga ulo manaog nga malinawon ngadto sa Sheol.…
  • 1 Mga Hari 2:7
     Apan pakitai ug kaayo ang mga anak nga lalaki ni Barsilai nga Gileadhanon, ug himoa sila nga kauban niadtong magkaon diha sa imong lamisa, kay ingon sila niana ka ayo kanako sa dihang mikagiw ako gikan kang Absalom nga imong igsoon. …
  • 1 Mga Hari 2:8
     Ug anaa usab uban kanimo si Simei, ang anak nga lalaki ni Gera nga kaliwat ni Benjamin sa Bahurim, nga mitunglo kanako sa bug-at nga pagtunglo sa adlaw nga miadto ako sa Mahanaim. Apan sa nga diha siya mianhi aron sa pagpakigkita kanako sa Jordan, ug ako nanumpa kaniya tungod sa Ginoo nga nag-ingon, ‘Dili ko ikaw patyon pinaagi sa espada.’…
  • 1 Mga Hari 2:9
    Busa karon, ayaw isipa nga siya walay sala, kay ikaw usa ka maalamon nga tawo ug ikaw mahibalo kon unsay buhaton kaniya ug ikaw magdala sa iyang ulo nga ubanon ngadto sa Sheol uban ang dugo.”…
  • 1 Mga Hari 2:10
    Ug si David mipahulay uban sa iyang katigulangan ug gilubong sa siyudad ni David.…
  • 1 Mga Hari 2:11
     Ug ang panahon sa paghari ni David sa Israel 40 ka tuig. Naghari siya sulod sa pito ka tuig didto sa Hebron, ug 33 ka tuig didto sa Jerusalem. …
  • 1 Mga Hari 2:12
     Ug si Solomon milingkod sa trono ni David nga iyang amahan ug ang iyang gingharian lig-on kaayo nga pagkatukod.…
  • 1 Mga Hari 2:13
    Unya si Adonias nga anak ni Hagit miadto kang Batseba nga inahan ni Solomon. Ug si Batseba miingon, “Mianhi ba ikaw uban ang pakigdait?” Siya miingon, “Uban ang pakigdait.” …
  • 1 Mga Hari 2:14
    Unya si Adonias miingon, “Ako adunay isulti kanimo.” Ug siya miingon, “Isulti kana.”…
  • 1 Mga Hari 2:15
    Ug si Adonias miingon, “Ikaw nahibalo nga ang gingharian akoa ug ang tibuok Israel nagpaabot gayod nga ako unta ang maghari. Apan ang gingharian gihikaw kanako ug nahimo nga iya sa akong igsoon kay iya man kini gikan sa Ginoo. …
  • 1 Mga Hari 2:16
    Karon ako adunay usa ka hangyo kanimo ug ayaw ako balibari.” Ug siya miingon kaniya, “Isulti kana.”…
  • 1 Mga Hari 2:17
    Siya miingon, “Ako naghangyo kanimo nga hangyoon nimo si Hari Solomon kay siya dili mobalibad kanimo, nga ihatag niya kanako si Abisag nga Sunamihanon, ingon nga akong asawa.”…
  • 1 Mga Hari 2:18
    Ug si Batseba miingon, “Oo, ako mosulti alang kanimo ngadto sa hari,”…
  • 1 Mga Hari 2:19
    Busa si Batseba miadto kang Hari Solomon aron sa pagpakigsulti kaniya alang kang Adonias. Ug ang hari mitindog aron sa pagsugat kang Batseba ug miyukbo kaniya. Unya milingkod siya sa iyang trono, ug gipahimutang ang usa ka lingkoranan nga gidala alang sa inahan sa hari ug siya milingkod dapit sa iyang tuo.…
  • 1 Mga Hari 2:20
    Unya si Batseba miingon, “Aduna akoy usa ka gamayng hangyo kanimo, ug ayaw akog balibari.” Ug ang hari miingon kaniya, “Ibungat ang imong hangyo, inahan ko, kay ikaw dili nako balibaran.” …
  • 1 Mga Hari 2:21
    Ug siya miingon, “Ipaasawa si Abisag nga Sunamihanon kang Adonias nga imong igsoon.” …
  • 1 Mga Hari 2:22
    Si Hari Solomon mitubag sa iyang inahan, “Ug nganong nangayo man ikaw kang Abisag nga Sunamihanon alang kang Adonias? Pangayoa usab alang kaniya ang gingharian, kay siya magulang man nako nga igsoon ug dapig kaniya sila si Abiatar nga pari ug si Joab nga anak ni Zeruia.” …
  • 1 Mga Hari 2:23
    Unya si Hari Solomon nanumpa diha sa Ginoo nga nag-ingon, “Ang Dios magbuhat unta sa ingon kanako ug labaw pa, kon kining pulonga wala magkahulogan sa kinabuhi ni Adonias!…
  • 1 Mga Hari 2:24
    Busa karon, ingon nga ang Ginoo buhi, nga maoy nagpalig-on kanako ug nagpalingkod kanako sa trono ni David nga akong amahan ug maoy nagbuhat kanako ug usa ka balay sumala sa iyang gisaad, kinahanglang patyon gayod si Adonias niining adlawa.”…
  • 1 Mga Hari 2:25
    Busa gipadala ni Hari Solomon si Benaias nga anak ni Jehoiada ug iyang gidunggab siya, ug siya namatay.…
  • 1 Mga Hari 2:26
    Unya miingon ang hari kang Abiatar nga pari, “Lakaw ngadto sa Anatot sa imong yuta kay ikaw angay sa kamatayon. Apan ikaw dili nako patyon niining panahona kay ikaw nagdala sa sudlanan sa kasabotan sa Ginoong Dios sa atubangan ni David nga akong amahan, ug tungod kay ikaw nakig-ambit sa tanan nga kasakit sa akong amahan.”…
  • 1 Mga Hari 2:27
    Busa gipapahawa ni Solomon si Abiatar gikan sa iyang pagkapari sa Ginoo aron matuman ang pulong sa Ginoo nga iyang gipamulong mahitungod sa balay ni Eli didto sa Silo.…
  • 1 Mga Hari 2:28
    Ug sa pagkabalita ni Joab niini, kay si Joab midapig man kang Adonias, bisan ug wala siya modapig kang Absalom, midagan siya ngadto sa Tolda sa Ginoo, ug migunit sa mga sungaysungay sa halaran.…
  • 1 Mga Hari 2:29
    Ug gisugilon kini kang Hari Solomon, “Si Joab midagan ngadto sa Tolda sa Ginoo ug tan-awa, siya anaa tupad sa halaran.” Unya gipaadto ni Solomon si Benaia nga anak ni Jehoiada, nga nag-ingon, “Lakaw, patya siya.”…
  • 1 Mga Hari 2:30
    Busa si Benaias miadto sa Tolda sa Ginoo ug miingon kaniya, “Ang hari nagsugo, ‘Gawas diha.’ ” Apan siya miingon, “Dili, mamatay ako dinhi.” Ug gidala pag-usab ni Benaias ang pulong ngadto sa hari nga nag-ingon, “Mao kini ang gipamulong ni Joab ug kini mao ang iyang gitubag kanako.”…
  • 1 Mga Hari 2:31
    Ug ang hari miingon kaniya, “Buhata sumala sa iyang giingon ug patya siya ug ilubong siya, ug sa ingon makuha gikan kanako ug sa banay sa akong amahan ang sala tungod sa dugo nga gipaagas ni Joab sa walay hinungdan. …
  • 1 Mga Hari 2:32
    Ug ang Ginoo mopasumbalik sa iyang mga dugoong buhat ngadto sa iyang kaugalingong ulo, tungod kay sa walay pagpahibalo sa akong amahan nga si David, gipatay niya ang duha ka tawo nga matarong ug maayo kay kaniya, nga mao si Abner nga anak ni Ner nga tigmando sa kasundalohan sa Israel ug si Amasa nga anak ni Jeter nga tigmando sa kasundalohan sa Juda. …
  • 1 Mga Hari 2:33
    Busa paninglon ang ilang dugo diha sa ulo ni Joab ug diha sa ulo sa iyang kaliwatan sa walay kataposan. Apan ngadto kang David ug sa iyang kaliwatan ug sa iyang balay ug sa iyang trono, may kalinaw gikan sa Ginoo hangtod sa kahangtoran.”…
  • 1 Mga Hari 2:34
    Unya si Benaias nga anak ni Jehoiada misaka ug midunggab kaniya ug gipatay siya ug gilubong didto sa iyang kaugalingong balay didto sa kamingawan.…
  • 1 Mga Hari 2:35
    Ug ang hari mibutang kang Benaias nga anak ni Jehoiada ibabaw sa kasundalohan ingon nga puli kang Joab, ug ang hari mibutang kang Zadok nga pari ingon nga puli kang Abiatar.…
  • 1 Mga Hari 2:36
    Unya gipatawag sa hari si Simei ug giingnan siya, “Pagtukod ug balay alang sa imong kaugalingon didto sa Jerusalem ug pagpuyo didto, ug ayaw pag-adto gikan didto ngadto sa bisan diin. …
  • 1 Mga Hari 2:37
    Kay sa adlaw nga ikaw mobiya, ug molabang sa sapa sa Kidron, hibaloi nga ikaw mamatay gayod ug ang imong dugo anha sa ibabaw sa imong kaugalingong ulo.”…
  • 1 Mga Hari 2:38
    Ug si Simei miingon sa hari, “Maayo ang imong giingon, sumala sa giingon sa akong agalong hari, mao kini ang buhaton sa imong sulugoon.” Ug si Simei nagpuyo sa Jerusalem sa daghang mga adlaw.…
  • 1 Mga Hari 2:39
    Ug nahitabo nga sa pagkahuman sa tulo ka tuig, duha sa mga sulugoon ni Simei ang mikagiw ngadto kang Akis nga anak ni Maaca, hari sa Gat. Ug sa dihang gisuginlan si Simei, “Tan-awa, ang imong mga ulipon atua sa Gat,”…
  • 1 Mga Hari 2:40
    Si Simei mitindog ug gimonturahan ang iyang asno ug miadto sa Gat ngadto kang Akis aron sa pagpangita sa iyang mga ulipon. Ug nadala ni Simei ang iyang mga ulipon gikan sa Gat.…
  • 1 Mga Hari 2:41
    Sa dihang gisuginlan si Solomon nga si Simei miadto gikan sa Jerusalem ngadto sa Gat ug mibalik,…
  • 1 Mga Hari 2:42
    Gipatawag sa hari si Simei ug miingon kaniya, “Dili ba gipapanumpa ko man ikaw ngadto sa Ginoo ug nagpasidaan kanimo nga nag-ingon, ‘Hibaloi gayod nga sa adlaw nga ikaw mogula ug molakaw sa bisan diin nga dapit, ikaw mamatay gayod?’ Ug ikaw miingon kanako, ‘Ang imong gisulti maayo. Motuman ako.’ …
  • 1 Mga Hari 2:43
    Nganong wala man nimo tumana ang imong gipanumpa sa Ginoo ug ang sugo nga akong gipatuman kanimo?”…
  • 1 Mga Hari 2:44
    Ang hari miingon usab kang Simei, “Ikaw nahibalo diha sa imong kasingkasing sa tanan nga daotan nga imong gibuhat ngadto kang David nga akong amahan, busa ipasumbalik sa Ginoo ang imong pagkadaotan ibabaw sa imong kaugalingong ulo. …
  • 1 Mga Hari 2:45
    Apan si Hari Solomon mahimong bulahan ug ang trono ni David mahimong lig-on sa atubangan sa Ginoo hangtod sa kahangtoran.” …
  • 1 Mga Hari 2:46
    Busa ang hari misugo kang Benaias nga anak ni Jehoiada, ug siya miadto ug midunggab kang Simei ug siya namatay. Busa ang gingharian nalig-on diha sa kamot ni Solomon.…