2 Mga Hari 7 | Holy Bible Words

2 Mga Hari 7:1
Apan si Eliseo miingon, “Pamatia ninyo ang pulong sa Ginoo. Kini mao ang giingon sa Ginoo: Ugma sa ingon niining taknaa ibaligya na lamang ug usa ka siklo ang usa ka takos nga maayong harina, ug ang duha ka takos nga sebada usa ka siklo, didto sa ganghaan sa Samaria.” …
2 Mga Hari 7:2
Unya ang pangulo nga maoy sinaligan sa hari miingon sa tawo sa Dios, “Kon ang Ginoo maghimo ug mga tamboanan sa langit, mahitabo kaha kining butanga?” Apan siya miingon, “Ikaw makakita niana sa imong mga mata, apan dili ikaw makakaon niana.”…
2 Mga Hari 7:3
Karon dihay upat ka tawong sanlahon sa tugkaran sa ganghaan ug sila nag-ingon sa usa ug usa, “Nganong manglingkod man kita dinhi hangtod nga kita mangamatay?…
2 Mga Hari 7:4
Kon kita moingon, ‘Manulod kita ngadto sa siyudad,’ ang gutom atua sa siyudad ug kita mangamatay didto, ug kon kita manglingkod dinhi, mangamatay usab kita. Busa karon mangadto kita sa kampo sa mga Sirianhon. Kon ipalingkawas nila ang atong kinabuhi mangabuhi kita ug kon ila kitang patyon mangamatay kita.”…
2 Mga Hari 7:5
Busa nanindog sila sa pagkabanagbanag, aron sa pag-adto sa kampo sa mga Sirianhon. Apan sa pag-abot nila didto sa daplin sa kampo sa mga Sirianhon, walay tawo didto.…
2 Mga Hari 7:6
Kay ang Ginoo naghimo sa kasundalohan sa mga Sirianhon nga makabati ug dinahunog sa mga karwahi, ug sa mga kabayo ug sa kagahob sa dakong pundok sa kasundalohan ug sila nag-ingon sa usa ug usa, “Tan-awa, ang hari sa Israel nagsuhol batok kanato ug mga hari sa mga Hitihanon ug mga hari sa Ehipto sa pag-asdang kanato.”…
2 Mga Hari 7:7
Busa sila namangon ug nangagiw sa pagkabanagbanag ug gibiyaan ang ilang mga tolda, mga kabayo, mga asno, ang kampo sa maong kahimtang ug nangagiw alang sa ilang kinabuhi.…
2 Mga Hari 7:8
Ug sa pag-abot niining mga sanlahon didto sa daplin sa kampo, nanulod sila sa usa ka tolda ug nangaon ug nanginom ug nagdala gikan didto ug plata ug bulawan, ug bisti, ug nanglakaw ug gitagoan kini. Unya namalik sila ug misulod sa laing tolda ug nakadala usab ug mga butang gikan didto, ug nanglakaw ug gitagoan kini.…
2 Mga Hari 7:9
Unya sila nag-ingon sa usa ug usa, “Kita wala magbuhat sa maayo. Kining adlawa, adlaw sa mga maayong balita. Kon magpakahilom lamang kita ug magpaabot hangtod sa kabuntagon, maabtan kita sa silot, busa dali kamo karon, mangadto kita ug atong suginlan ang banay sa hari.” …
2 Mga Hari 7:10
Busa nangadto sila ug mitawag sa tigbantay sa ganghaan sa siyudad, ug gisuginlan nila sila, “Miadto kami sa kampo sa mga Sirianhon ug walay tawo didto, bisan tingog sa usa ka tawo, apan ang mga kabayo, ug ang mga asno gipanghigot ug ang mga tolda mao sa gihapon.” …
2 Mga Hari 7:11
Ug siya mitawag sa mga tigbantay sa ganghaan, ug sila misugilon niini sa banay sa hari. …
2 Mga Hari 7:12
Ug ang hari mibangon pagkagabii, ug misulti sa iyang mga sulugoon, “Suginlan ko kamo kon unsa ang giandam sa mga Sirianhon batok kanato. Sila nahibalo nga kita gigutom, busa namahawa sila sa kampo aron sa pagtago sa ilang kaugalingon diha sa kapatagan nga naghunahuna, ‘Sa ilang paggula sa siyudad, dakpon nato sila nga buhi ug manulod kita ngadto sa siyudad.’ ”…
2 Mga Hari 7:13
Ug usa sa iyang mga sulugoon miingon, “Pakuhaa ang pipila ka tawo ug lima sa mga nahibilin nga kabayo, kay sila nga nahibilin dinhi mahisama sa panon sa Israel nga nangamatay. Pagsugo ug atong tan-awon.” …
2 Mga Hari 7:14
Busa nagkuha sila ug duha ka tawo nga ilang gipasakay sa kabayo ug ang hari nagpadala kanila aron sa pagsunod sa kasundalohan sa mga Sirianhon, nga nag-ingon, “Adto ug tan-awa.”…
2 Mga Hari 7:15
Ug sila misunod kanila hangtod sa Jordan, ug tan-awa ang tanang dalan nalukop sa mga bisti ug mga sudlanan nga nabiyaan sa mga Sirianhon sa ilang pagdali. Ug ang mga sulugoon namalik ug gisuginlan ang hari.…
2 Mga Hari 7:16
Unya ang katawhan nanggula ug gipanguhaan ang kampo sa mga Sirianhon. Busa ang usa ka takos sa maayo nga harina gibaligya ug usa ka siklo, ug ang duha ka takos nga sebada, usa ka siklo, sumala sa pulong sa Ginoo. …
2 Mga Hari 7:17
Gitudlo sa hari ang pangulo nga iyang sinaligan aron maoy magdumala didto sa ganghaan; ang katawhan mitunobtunob kaniya diha sa ganghaan ug siya namatay sumala sa gipamulong sa tawo sa Dios sa dihang miadto ang hari kaniya. …
2 Mga Hari 7:18
Kay sa pagsulti sa tawo sa Dios ngadto sa hari, “Duha ka takos nga sebada ibaligya ug usa ka siklo, ug usa ka takos nga maayong harina usa ka siklo, sa ingon niining taknaa ugma didto sa ganghaan sa Samaria,” …
2 Mga Hari 7:19
ang pangulo mitubag sa tawo sa Dios, “Bisan kon ang Ginoo maghimo ug mga tamboanan sa langit, mahimo ba kaha kining butanga?” Ug siya miingon, “Ikaw makakita niana sa imong kaugalingong mga mata, apan dili ikaw makakaon niini.” …
2 Mga Hari 7:20
Busa kini nahitabo kaniya, kay gitunobtunoban man siya sa katawhan didto sa ganghaan, ug siya namatay.…