2 Mga Hari 2 | Holy Bible Words

2 Mga Hari 2:1
Sa diha nga hapit na kuhaon sa Ginoo si Elias pinaagi sa usa ka alimpulos ngadto sa langit, nagpanaw si Elias uban kang Eliseo gikan sa Gilgal. …
2 Mga Hari 2:2
Ug si Elias miingon kang Eliseo, “Pabilin dinhi kay ang Ginoo nagpadala kanako hangtod sa Betel.” Apan si Eliseo miingon, “Ingon nga ang Ginoo buhi, ug ingon nga ikaw buhi, ako dili mobiya kanimo.” Busa sila milugsong ngadto sa Betel. …
2 Mga Hari 2:3
Ug ang pundok sa mga propeta nga didto sa Betel miadto kang Eliseo ug miingon kaniya, “Nahibalo ba ikaw nga niining adlawa kuhaon sa Ginoo gikan kanimo ang imong agalon?” Ug siya miingon, “Oo, nahibalo ako niini, paghilom kamo.”…
2 Mga Hari 2:4
Si Elias miingon kaniya, “Eliseo, pabilin dinhi kay gipadala ako sa Ginoo ngadto sa Jerico.” Apan siya miingon, “Ingon nga ang Ginoo buhi, ug ingon nga ikaw buhi, dili ako mobiya kanimo.” Busa miadto sila sa Jerico. …
2 Mga Hari 2:5
Ang pundok sa mga propeta nga didto sa Jerico, miduol kang Eliseo ug miingon kaniya, “Nahibalo ba ikaw nga niining adlawa kuhaon sa Ginoo gikan kanimo ang imong agalon?” Ug siya mitubag, “Oo, nahibalo ako niini, paghilom kamo.”…
2 Mga Hari 2:6
Unya si Elias miingon kaniya, “Pabilin dinhi kay gipadala ako sa Ginoo ngadto sa Jordan.” Apan siya miingon, “Ingon nga ang Ginoo buhi, ug ingon nga ikaw buhi, dili ako mobiya kanimo.” Ug silang duha mipadayon. …
2 Mga Hari 2:7
Ug 50 sa mga anak nga lalaki sa mga propeta nangadto usab ug nagtindog layo kanila samtang silang duha nagtindog duol sa Jordan. …
2 Mga Hari 2:8
Ug gikuha ni Elias ang iyang kupo ug gilukot ug gihampak ang tubig, ug nabahin kini ug silang duha nanabok agi sa uga nga yuta.…
2 Mga Hari 2:9
Sa dihang nakalabang na sila, si Elias miingon kang Eliseo, “Pangayo unsay akong buhaton alang kanimo, sa dili pa ako kuhaon gikan kanimo.” Ug si Eliseo miingon, “Ako naghangyo kanimo, ipapanunod kanako ang imong espiritu sa duha ka pilo.” …
2 Mga Hari 2:10
Ug siya miingon, “Ikaw naghangyo sa usa ka lisod nga butang, apan bisan pa niana, kon ikaw makakita kanako sa diha nga ako kuhaon na gikan kanimo, mahimo kini alang kanimo, apan kon dili ikaw makakita kanako, dili kana mahimo.” …
2 Mga Hari 2:11
Ug sa diha nga sila nagpadayon ug nagsulti, dihay usa ka karwahi nga kalayo ug mga kabayo nga kalayo nga mibulag kanilang duha. Ug si Elias mikayab ngadto sa langit pinaagi sa usa ka alimpulos.…
2 Mga Hari 2:12
Ug si Eliseo nakakita niini ug siya misinggit, “Akong amahan, akong amahan! Ang mga karwahi sa Israel ug ang mga nagkabayo niini!” Ug siya wala na makakita kaniya. Iyang gikuptan ang iyang kaugalingong mga bisti ug gigisi kini niya sa duha ka bahin.…
2 Mga Hari 2:13
Unya iyang gikuha ang kupo ni Elias nga nahulog gikan kaniya ug mibalik pagtindog sa daplin sa Jordan.…
2 Mga Hari 2:14
Ug iyang gikuha ang kupo ni Elias nga nahulog gikan kaniya ug gihampak ang tubig ug miingon, “Hain man ang Ginoo, ang Dios ni Elias?” Ug sa paghampak niya sa tubig, nabahin kini ug si Eliseo mitabok.…
2 Mga Hari 2:15
Unya sa pagkakita kaniya sa pundok sa mga propeta nga didto sa Jerico atbang kaniya, sila miingon, “Ang espiritu ni Elias anaa kang Eliseo.” Ug sila nangadto sa pagtagbo kaniya ug miyukbo diha sa yuta sa atubangan niya. …
2 Mga Hari 2:16
Ug sila miingon kaniya, “Tan-awa karon, ania sa imong mga sulugoon ang 50 ka kusgan nga mga tawo. Palakta sila, kami naghangyo kanimo, ug ipapangita ang imong agalon, tingali ug ang Espiritu sa Ginoo mikuha kaniya ug gibutang siya sa kabukiran o sa kapatagan.” Ug siya miingon, “Ayaw sila ipadala.”…
2 Mga Hari 2:17
Apan sa diha nga gipugos nila siya hangtod nga siya naulaw, siya miingon, “Ipadala sila.” Busa nagpadala sila ug 50 ka tawo ug nangita sila sulod sa tulo ka adlaw apan wala siya makit-i. …
2 Mga Hari 2:18
Ug sila mibalik kaniya samtang nagpabilin siya didto sa Jerico ug siya miingon kanila, “Wala ba ako moingon kaninyo, Ayaw pag-adto?”…
2 Mga Hari 2:19
Unya ang mga tawo sa siyudad miingon kang Eliseo, “Tan-awa, ang kahimtang niining siyudara makapahimuot, sumala sa nakita sa akong agalon, apan ang tubig dili maayo ug ang yuta walay abot.” …
2 Mga Hari 2:20
Ug siya miingon, “Dad-i ako ug usa ka bag-ong panaksan ug butangi kini ug asin.” Busa ila kining gidala ngadto kaniya. …
2 Mga Hari 2:21
Unya miadto siya sa tuburan sa tubig, ug gilabay ang asin ug miingon, “Mao kini ang giingon sa Ginoo, ‘Gihimo na nakong maayo kining tubiga, dili na kini makamatay o makakuha sa gisabak.’ ” …
2 Mga Hari 2:22
Busa ang tubig maayo na hangtod niining adlawa, sumala sa pulong nga gisulti ni Eliseo.…
2 Mga Hari 2:23
Mitungas siya gikan didto ngadto sa Betel, ug sa nagpaingon pa siya diha sa dalan, may mga batang lalaki nga nanggula gikan sa siyudad ug nagbugalbugal kaniya ug miingon, “Tungas, upaw! Tungas, upaw!”…
2 Mga Hari 2:24
Ug siya milingi ug sa pagkakita niya kanila, gitunglo niya sila sa ngalan sa Ginoo. Unya migula ang duha ka oso nga baye gikan sa kakahoyan ug mikunis-kunis sa 42 ka batang lalaki. …
2 Mga Hari 2:25
Ug gikan didto, miadto siya sa bukid sa Carmel, ug unya mipauli sa Samaria.…