1 Samuel 24 | Holy Bible Words

1 Samuel 24:1
Sa pagbalik ni Saul gikan sa paggukod sa mga Filistihanon, gisuginlan siya, “Si David atua sa kamingawan sa En-gedi.” …
1 Samuel 24:2
Unya si Saul mikuha ug tulo ka libo ka piniling tawo gikan sa tibuok Israel ug miadto aron sa pagpangita kang David ug sa iyang mga tawo sa atubangan sa mga Bato sa mga Kanding nga Ihalas.…
1 Samuel 24:3
Siya miabot sa mga toril sa mga karnero daplin sa agianan, diin may usa ka langob, ug si Saul misulod aron sa pagpahuwas sa iyang kaugalingon. Niadtong tungora, si David ug ang iyang mga tawo nanglingkod sa kinasulorang bahin sa maong langob. …
1 Samuel 24:4
Ug ang mga tawo ni David miingon kaniya, “Mao kining adlawa ang giingon sa Ginoo kanimo, ‘Tan-awa, akong itugyan ang imong kaaway nganha sa imong kamot ug ikaw magbuhat ngadto kaniya sa unsay maayo alang kanimo.’ ” Unya si David mitindog ug gitabasan sa hilom ang sidsid sa bisti ni Saul. …
1 Samuel 24:5
Ug human kini mahitabo, ang kasingkasing ni David daw misakit kaniya tungod kay iyang gitabasan ang sidsid sa bisti ni Saul. …
1 Samuel 24:6
Siya miingon sa iyang mga tawo, “Ang Ginoo nagdili nga ako magbuhat niining butanga sa akong agalon, ang dinihogan sa Ginoo, sa pagbakyaw sa akong kamot batok kaniya, kay siya dinihogan sa Ginoo.” …
1 Samuel 24:7
Busa gibadlong ni David ang iyang mga tawo niining mga pulonga ug wala motugot kanila nga hasmagan si Saul. Ug si Saul mitindog ug mibiya sa langob ug mipadayon sa iyang paglakaw.…
1 Samuel 24:8
Human niana, mitindog usab si David ug migula sa langob ug mitawag kang Saul, “Akong agalon nga hari!” Sa diha nga si Saul milingi sa iyang luyo, si David miyukbo nga ang iyang nawong duol sa yuta ug naghatag ug katahoran. …
1 Samuel 24:9
Si David miingon kang Saul, “Nganong namati ikaw sa mga pulong sa mga tawo, nga nag-ingon, ‘Si David daotan ug tuyo kanimo’?…
1 Samuel 24:10
Niining adlawa ang imong mata nakakita kon giunsa sa Ginoo pagtugyan kanimo sa akong kamot didto sa langob, ug ang uban nag-awhag kanako sa pagpatay kanimo, apan ako nagpalingkawas kanimo ug ako miingon, ‘Dili nako bakyawon ang akong kamot batok sa akong agalon kay siya mao ang dinihogan sa Ginoo.’ …
1 Samuel 24:11
Tan-awa, akong amahan, ang sidsid sa imong bisti sa akong kamot, kay nianang pagputol nako sa sidsid sa imong bisti ug nga wala ikaw nako patya, mahibaloan nimo ug makita nga wala gayoy daotan o paglapas sa akong kamot. Wala ako makasala batok kanimo bisan pa ug nangita ikaw sa akong kinabuhi aron sa pagkuha niini.…
1 Samuel 24:12
Ang Ginoo maghukom unta taliwala kanimo ug kanako, ug ang Ginoo magbalos kanimo alang kanako, apan ang akong kamot dili gayod makigbatok kanimo.…
1 Samuel 24:13
Sumala sa giingon sa karaan nga panultihon, ‘Gikan sa daotan mogula ang pagkadaotan’, apan ang akong kamot dili gayod makigbatok kanimo.…
1 Samuel 24:14
Kinsa bay hinungdan sa paggula sa hari sa Israel? Kinsa ba ang imong gigukod? Usa ka iro nga patay! Usa ka pulgas! …
1 Samuel 24:15
Ang Ginoo mao unta ang maghukom ug mohatag sa paghukom taliwala kanako ug kanimo ug motan-aw ug molaban sa akong katungod ug magluwas kanako gikan sa imong kamot.”…
1 Samuel 24:16
Sa diha nga nahuman na pagsulti ni David niining mga pulonga ngadto kang Saul, si Saul miingon, “Mao ba kini ang imong tingog, akong anak nga David?” Ug gipatugbaw ni Saul ang iyang tingog ug mihilak. …
1 Samuel 24:17
Siya miingon kang David, “Ikaw labaw pang matarong kay kanako kay ikaw nagbalos kanako ug maayo, samtang gihatag nako kanimo ang daotan.…
1 Samuel 24:18
Ug ikaw nagpadayag niining adlawa kon unsa ang pagkamaayo nimo kanako, nga sa ingon wala nimo ako patya sa diha nga ang Ginoo nagtugyan kanako nganha sa imong kamot.…
1 Samuel 24:19
Kay kon ang usa ka tawo makakita sa iyang kaaway, buhian ba kaha niya siya nga walay kadaot? Busa ang Ginoo magbalos unta kanimo sa maayo tungod sa imong gibuhat kanako niining adlawa. …
1 Samuel 24:20
Ug karon ako nahibalo nga ikaw sa walay duhaduha mahimong hari ug nga ang gingharian sa Israel malig-on diha sa imong kamot.…
1 Samuel 24:21
Busa panumpa kanako tungod sa Ginoo nga dili nimo puohon ang akong kaliwat sunod kanako ug dili papason ang akong ngalan sa balay sa akong amahan.”…
1 Samuel 24:22
Ug si David nanumpa niini kang Saul. Unya si Saul mipauli apan si David ug ang iyang mga tawo nangadto sa lig-ong kuta.…