1 Samuel 29 | Holy Bible Words

1 Samuel 29:1
Karon ang mga Filistihanon nagtigom sa tanan nilang kasundalohan didto sa Afkek ug ang Israelinhon nagkampo tupad sa tubod nga anaa sa Jezreel.…
1 Samuel 29:2
Samtang ang mga kadagkoan sa mga Filistihanon nangagi sa tinaggatos ug sa tinaglibo, ug si David ug ang iyang mga tawo nangagi sa luyo uban kang Akis,…
1 Samuel 29:3
ang mga tigmando sa mga Filistihanon miingon “Unsay gibuhat niining mga Hebreo dinhi?” Ug si Akis miingon sa mga tigmando sa mga Filistihanon, “Dili ba kini si David, ang sulugoon ni Saul nga hari sa Israel, nga uban kanako sulod sa mga adlaw ug mga tuig? Sukad sa iyang pagtipon kanako, wala ako makakita ug sayop diha kaniya hangtod niining adlawa.”…
1 Samuel 29:4
Apan ang mga tigmando sa mga Filistihanon nasuko kaniya ug ang mga tigmando sa mga Filistihanon miingon kaniya, “Papaulia ang tawo aron siya mobalik sa dapit diin siya nimo gibutang. Dili siya molugsong uban kanato ngadto sa gubat kay tingali unya ug mobatok siya kanato didto sa gubat. Kay unsaon man niining tawhana sa pagpakig-uli sa iyang kaugalingon ngadto sa iyang agalon? Dili ba kini pinaagi sa mga ulo sa mga tawo dinhi?…
1 Samuel 29:5
Dili ba mao kini si David nga mahitungod kaniya sila nag-awit sa usa ug usa diha sa mga pagsayaw,‘Si Saul nakapatay sa iyang mga linibo,ug si David sa iyang mga tagnapulo ka libo’?”…
1 Samuel 29:6
Unya gitawag ni Akis si David ug giingnan, “Ingon nga ang Ginoo buhi, ikaw nagmatinud-anon ug alang kanako maayo nga ikaw mogula ug mosulod uban kanako diha sa panon, kay wala ako makakita ug daotan diha kanimo sukad sa adlaw sa imong pag-anhi kanako hangtod niining adlawa. Apan bisan pa niini ang mga pangulo wala mouyon kanimo. …
1 Samuel 29:7
Busa karon pauli ug lakaw nga malinawon aron dili masuko kanimo ang mga pangulo sa mga Filistihanon.” …
1 Samuel 29:8
Si David miingon kang Akis, “Apan unsay akong nabuhat? Ug unsay imong nakita sa imong sulugoon sukad niadtong adlaw nga misugod ako sa pag-alagad kanimo hangtod karon, aron dili ako moadto ug makig-away batok sa mga kaaway sa akong agalon nga hari?”…
1 Samuel 29:9
Ug si Akis mitubag kang David, “Ako nahibalo nga ikaw walay sala sa akong panan-aw sama sa usa ka anghel sa Dios, apan bisan pa niini, ang mga tigmando sa mga Filistihanon nag-ingon, ‘Siya dili makauban kanato ngadto sa gubat.’ …
1 Samuel 29:10
Busa bangon ug sayo sa pagkabuntag uban sa mga sulugoon sa imong agalon nga mianhi uban kanimo, ug biya sayo sa pagkabuntag sa diha nga mohayag na.” …
1 Samuel 29:11
Busa si David mibiya uban sa iyang mga tawo sayo sa pagkabuntag, aron mobalik ngadto sa yuta sa mga Filistihanon. Ug ang mga Filistihanon miadto sa Jesreel.…